بالتأكيد تختلف كل مديرة بيت عن الأخرى فى أسلوب إدارتها لبيتها وأسرتها. الأكيد هو أننا جميعا نسعى من أجل حياة أفضل لنا ولبيوتنا ولأسرتنا. قد يتعثر البعض أحيانا وقد يتعب أو يمل ولكننا نعود مرة أخرى لاستكمال المهمة العظيمة التى اختارنا الله من أجلها والأكيد أيضا أنه لا يمكن أن يدير أحد بيتك وأسرتك إلا أنت.

momtypespic100-70

الأنواع التالية تعد ملاحظات عامة يمكن أن تساعد البعض فى فهم شخصيتها أكثر كمديرة للبيت وتصليح العيوب إن وجد أو مواجهة المشاكل. ممكن تلاقى نفسك فى نوع منهم أو فى نوعين مع بعض. المهم تعيدى اكتشاف ذاتك.

1- الطاحونة

الأم المطحونة شغل ومطحونة بيت وعيال وتمارين ودى مشغولة علطول وتعبانة علطول ودى غالبا بتكون Kids oriented أو مركزة مع العيال بدرجة زيادة.

نتيجة ده بتكون: إهمال لنفسها وعدم وجود أفكار لتطوير البيت أو الحالة المعيشية وبالتالى اكتئاب

2- المحسوكة Perfectionist

ودى بتكون قلوقة من كل شىء وللتنظيف عندها أهمية قصوى والبيت بيبرق علطول والعيال لازم يبرقوا علطول والأكل يطبخ بطريقة معينة ونشترى من أماكن معينه وهكذا

نتيجة ده بتكون: إهمال الجانب الفكرى أو العاطفى لنفسها وللأولاد – احساس بصعوبة جميع الأعمال – تأثير على مصروف البيت – قلق دائم وخوف من عدم تحقق المطلوب

3- الدماغ

أو ال food oriented ودى أكبر تركيزها على الأكل وان يكون فى غدا، لكن تتعايش مع الكراكيب عادى أو مفيش نظام ولا روتين ولا احترام مواعيد

نتيجة ده: تأثير سلبى على تربية الأولاد وضياع العديد من الفرص وعدم اتزان البيت – تأثير كمان على مصروف البيت

4- الشكاية

علطول بتقول انها عايزة تشتغل أو عايزة وقت لنفسها مع أن عندها وقت لكن مش بتعرف تستغله كويس – غالبا بطيئة مبتحسش بالاستمتاع ولا الراحة فى بيتها وغالبا أطفالها لسه صغيرين.

نتيجة ده: زهق من الحياة بأكملها يؤثر على رغبتها فى التعايش وعلى الأولاد طبعا.

5- البريمادونا

ودى اعتمادها الأكبر على ماما أو الشغالة أو النانى أو أى حد تانى عموما – بس مش ناسيه نفسها ودى مشكلتها بتظهر للأسف متأخر بعد ضياع فترة طويلة من التخبط وعدم التركيز مع البيت والأسرة . غالبا بتكون أم جديدة.

نتيجة ده أنها بتصدم بالواقع فى أول مشكلة بترغمها على تحمل المسئولية. وبتظهر مشكلة عدم الخبرة فى شىء.

6- الرايقة

علطول تهندم فى نفسها وفى البيت وممكن تقعد فى المطبخ ساعات وكل شىء واخد حقه وزيادة فى البيت وللأولاد. لكن ده تأثيره بيبان فى ضياع الوقت وعدم الالتزام بالمواعيد

7- المتوازنة

ودى بتحاول توازن كل الأمور بقدر الإمكان ومش مهم يكون كل شىء ممتاز فى كل الأوقات لكن كل الاحتياجات مجابه. النوع ده مشغول علطول لكن أحيانا بيكون الشغل نعمة.

بتحتاج دايما راحة او اجازة تفصل من كله.

ست البيت