التحرش الجنسى للأطفال

كيف نحمي أبناءنا من التحرش الجنسي

فيديو مسموع من تمانية وتلاتين دقيقة للمستشارة الأسرية: دعاء صفوت 

جمعت فيه معلومات شافية ووافية عن موضوع التحرش الجنسي وازاي اعلم ابني يحمي نفسه من التحرش بألعاب و اساليب عملية

مش مجرد كلام نظري

دا بالاضافة لمعرفة يعني ايه تحرش جنسي بالاطفال، ومن هو المتحرش الجنسي بالاطفال، و اعمل ايه لو لا قدر الله عرفت ان ابني او بنتي تم التحرش بهم

موضوع هام حقيقي ويستحق منكم التفرغ لسماعه هذه الدقائق

 

كيف نحمي أبناءنا من التحرش الجنسي

Read More
الأب والإبن

الضرب مش هايخليه راجل!

بقلم المستشارة الأسرية: دعاء صفوت 

عزيزي الأب

بص يا سيدي..الرسالة دي هاتوصلك انهاردة عشان زوجتك نفسها تقولك كلمتين بس مش عارفة ترتبهم ترتيب منطقي يقنعك، فأنا وهي(من خلال آلاف الاستشارات والله) هاناخد من وقتك دقائق عشان ابنك .. اللي احنا متفقين ان مافيش اغلى منه عندك

القسوة والعنف في التربية مش بتطلع الطفل راجل و مش هاتخليه يتحمل مصاعب الحياة، هي بس هاتخليه يتعقد و يمكن يكرهك ويكره نفسه ويتعلم يكذب بشكل اكثر اقناعا

القسوة والعنف بتقول للطفل انه مش محبوب و انه فاشل و لو صدق انه فاشل هايطلع فاشل و انت اكيد مش عايزه فاشل دا انت عايزه احسن الناس

القسوة والعنف و الضرب بتؤذي الطفل نفسيا بشكل انت عارفه.. عشان ما كنتش بتبقى مبسوط و انت بتنضرب و انت صغير و مش دا اللي طلعك راجل..

اللي بيصنع الرجال هو تحمل المسؤولية وانك تخليه يتحمل عقبات و توابع قراراته

و طبيعي ان الطفل يغلط والله دا طفل

و لما الطفل بيغلط مش بيبقى قصده يهينك او يقلل من قدرك او بيقلل من احترامك بالعكس هو طفل و لازم يغلط عشان يتعلم.. و لازم نعلمه عشان ما يغلطش تاني و لو غلط تاني نعلمه و لو غلط تاني نعلمه دا دورنا كأهل مسؤولين

والطفل مش لازم يخاف منك بل لازم يحبك ويحترمك، هو دا اللي يخلي اخلاقه رائعة في حضورك و في غيابك

لو خاف منك هايخبي عليك ولو خبى عليك ممكن تحصل بلاوي في فترة المراهقة مش هاتعرف عنها حاجة،

و انت اكيد مش عايز دا لابنك

الاب مش اشكيف الاب مربي و صديق و حنون

و اختم معاك بمعلومتين

بالنسبة للي بيقول الرسول اباح الضرب.. اسمع يا سيدي الرسول صلى الله عليه وسلم لم يضرب طفلا ولا خادما قط

و الضرب في الشرع (علموا اولادكم الصلاة لسبع، و اضربوهم عليها لعشر)

و انت راجل و ذكاءك الرياضي اعلى مننا نحن معشر النساء احسب معايا

عشان اعلم طفل الصلاة (وهي عماد الدين و هي ما شرع لأجله الضرب – دا بفرض انه مباح – ) الصلاة عشان اعلمها

لازم ادرب يعني اعلم يعني اشتغل و ابذل مجهود كام مرة بقى: 5 صلوات في اليوم × 365 يوم في السنة × 3 سنوات تطلعلها فوق الخمس الاف مرة

يعني لازم قبل الضرب تكون علمت الطفل تحديدا 5340 مرة و بعدها تضرب

فهل تعتقد ان كدا في مجال حقيقي للضرب؟

و التعليم عند سن سبع سنوات و الضرب بعد عشر سنوات

يعني الطفل اللي عنده خمس وست سنين و حتى عشر سنين مش حمل ضربك

انت راجل كبير و ناضج

و لازم تعرف قبل ما تضرب هل انا باضرب عشان انا غضبان ولا عشان اعلم الطفل حاجة

لو غضبان اتعامل مع غضبك لو سمحت

لو عشان تعلم الطفل حاجة مش بالضرب في اساليب تانية كتيرة ترغيب و تشجيع و بعدين حرمان من حاجة بيحبها بس بتحافظ على كرامته

الكرامة هي اللي هاتخليه راجل

انه يشوفك راجل هايخليه راجل

انت أب رائع.. و زوجتك أم رائعة محتاجة حبة تفهم عشان خاطر ابنكم ..

**************************

و تذكر أرجوك

(ولو كنت فظاً غليظ القلب لانفضوا من حولك) صدق الله العظيم

***********************

و ملحوظة كالعادة لعزيزتي الأم

بالراحة و بالتفاهم المعلومة الصحيحة هاتوصل.. انتي بس استمري في الابتسامة و منح الحب.. صدقيني الحياة هاتكون احلى

الضرب مش هايخليه راجل!

Read More

الطفل العنيد..المعاملة والعقاب

بقلم: دعاء صفوت

اكاد اكون ما قابلتش ام الا وهي بتشد شعرها من عناد اطفالها في السن دا.
و للاسف الشديد جدا أجد أمهات بتضرب اطفال في السن دا عشان  عنيد و عايز يمشي اللي في دماغه !!.

طيب خليني أقولك يا أم العنيد هنيئا لك بابنك.. عناد الطفل في هذا السن يعني ولله الحمد انه لا يعاني من التوحد ولن يعاني منه
و دا مش كلامي والله دا كلام دكاترة تربويين كبار أفتو بأن العناد حاجة إيجابية.. اه والله حاجة ايجابية زي ما باقولك كدا

و انه اعلان الطفل لاستقلاله والطفل بيقول انا كائن حي لي شخصية و طلبات و ان الطفل كلما كان عنيدا في الصغر كان قوي الشخصية مستقل في الكبر
يعني مش اي مجموعة اصدقاء سوء هاتلعب بدماغ ابنك

ولكن المشكلة فين بقى؟ المشكلة في الامهات اللي بتحط راسها براس الطفل و تعتبر انه عشان يبدو عليه انه فاهم فهو بيعاند غيظا فيها و نكاية بها هي الام المسكينة و تلاقيها تتشال و تتحط و تصرخ في كائن صغير بيمارس حقه الطبيعي في النمو

العناد مرحلة زي التسنين كدا وزي الفطام، لو تعاملنا معاها صح هاتعدي و خلاص لكن لو حاولنا نكسر الولد عندي حل من اتنين :

  • يا اما الطفل هايتستلم و يبقى طفل جبان خواف عديم الشخصية و يلجأ عقله للعناد السلبي.. يعني هو مش هايقولك لأ ولا يعاندك بس جسمه بيعاندك فنلاقي تأتأة، تبول لا ارادي، عنف، قرص و ضرب و عض
  • او الطفل هايكون شخصية قوية و يتسمر في العناد و يتعلم منك انتي طالما بتعاندي قدامه ان العناد سلوك مقبول ويعاند قدامك اكثر و هنا يتحول العناد من مرحلة الى صفة هاتعاني منها كتير بعد كدا

و العناد بيبدأ من سنة ونص الى سنتين ويختفي عند الثلاث سنوات تقريبا اذا تم التعامل معاه صح وعلى اساس الحوار واساس الخيارات وعدم الصراخ والضرب
ويرجع تاني عند سن الخمس سنوات، وهو عناد ليه، يعني الطفل بيعاند عشان عايز يفهم كل حاجة ليه ليه ليه، و هنا للاسف بعض الامهات بتزهق و تبتدي تقابل ليه الطفل بصراخ وان الطفل كدا بيعاندها ومش بيسمع الكلام ثم يختفي عند الست سنوات تقريبا ويرجع تاني بقى في ازهى صوره في سن الثمان تسع سنوات و يكون تمهيد لمرحلة المراهقة.. اللي العناد فيها شعار كبير اوي

كيف أتعامل مع الطفل العنيد؟

في السن الصغير اللي هو سنة وشوية سنتين، مطلوب مني اني اتقبل عناد الطفل و بلاش اصغر عقلي و حطي نفسك مكان الطفل، هو دلوقت سمة من سماته انه عايز يستكشف الدولاب، و انتي قولتي له لا. لأ بتاعتك عشان الدنيا ما تتبهدلش وانتي مش كل شوية هاتوضبي الدولاب و يا لهوي و يا خرابي
و الطفل عنده غريزة بتقول له استكشف عشان تنمو لازم تستكشف فيروح الطفل عند الدولاب تاني وانتي بقى يا ماما يا عاقلة تعتبري هذا الطفل الصغير بيتجرأ و يعصى اوامرك، و تقومي مزعقة و تقولي له انا قولت لا
طيب تشرفنا.. انتي ماما وانا الطفل اللي بينمو.. غريزتي مفهومة بالنسبة لي عن اللا بتاعتك دي.

يقوم الطفل يبصلك و يضحك.. في محاولة منه لاستعطافك او محاولة تغيير رايك.. مش محاولة لاغاظتك و تحديكي والله العظيم الطفل اكثر براءة من الفكرة المريضة دي. يضحكلك و يروح عند الدولاب. ويفتحه و يبهدل الدنيا

و انتي ترجعي تلاقي الهدوم في الارض تصابي بسكتة قلبية عشان الدولاب اتبهدل وهذا الكائن الصغير في ركن الدولاب تحداكي و كسر اوامرك وغاظك ونرفزك و انتي دلوقت غضبانة ومش شايفة وكل اللي بتفكري فيه هو تأدبي الولد دا ازاي ؟ !! لا في الواقع هو انتي بتفكري تنتقمي ازاي
و تقومي مصرخة وطراااااخ ضاربة الولد !! طب حطي نفسك مكانه: هو عايز يتسكشف ..ما ارتكبش جريمة.

كان الاولى بك لما تشوفيه بيحوم حوالين الدولاب انك تبادري و تفتحي الدولاب و تفرجيه على الهدوم بدل ما انتي شغلتي اسطوانة لا.. و انا قولت لا
و لو ما عملتيش كدا و سبتيه لما بهدل الدنيا و قولتي له يساعدك في ترتيب اللي بهدله هايتعلم
.و لو اصلا سبتي ليه ضرفة شوفونيره فاضية و حطيتيله العاب يفتح و يلعب بدون بهدلة يبقى احسن و احسن و احسن
.في بدائل كتير بدل موجة الغضب العارمة اللي عملتيها

الطفل العنيد مش طفل شرير عايز يؤذيكي بينما غضبك و عصبيتك بتؤذيه
حاسة انك مضغوطة و هاتهبي فيه، ما تاخديش رد فعل ، روحي الحمام اغسلي وشك و ارجعي بهدوء.  افتكري دائما انك كدا لو ضربتيه انتي بتهدمي شخصيته و استكشافه و بتعرضيه لعناد اكبر ولعلمك الطفل باله اطول مننا احنا فانتي اللي هاتخسري.
كمان بدل ما اقول للطفل البس التيشرت الاخضر وهو يصمم على الجاكت الكحلي الشتوي في عز الصيف، .انا اطلع له الحاجات المسموح انه يلبسها يعني اخليه يختار ضمن خياراتي، و كدا انا اكسب و هو يكسب

و بدل ما اقوله تعالى كل، فيقول لا.. احول السؤال لاختيارات، هاتاكل مكرونة ولا رز، و بالتالي لأ العندية ما بقتش خيار.

الموضوع عايز ذكاء وقوة شخصية، لأن فقط الشخصيات الضعيفة هي اللي مش بتقدر تتحكم في غضبها لدرجة ممكن تؤذي بها فلذات اكبادها.  اما بقى الحجة الاسخف في الكون ..أصله بيحرجني قدام الناس! عشان الناس هاتدمري ابنك؟ عشان كلام الناس هاتدمري شخصيته؟ عشان كلام الناس هاتخليه جبان و خواف و مهان الشخصية..؟
.هنيئا لك الناس

 ايه الحاجات الي بتخليكي تفكري تضربي او تعاقبي طفلك خلال اول سنتين من حياته؟

لو فكرت شوية تلاقيها كلها تصرفات طفولية لا تستدعي كل هذا الغضب و انك عشان هي مضغوطة بتزعقى.
فى أول سنتين من عمر الطفل لا يجوز معاقبة الطفل، فقط مدح السلوكيات الايجابية و اكررها للطفل عشان يعرف ايه الحلو اللي عمله و يعمل زيه تاني و اشجع و اشجع.

الاطفال في السن دا كتلة من الطاقة لازم تواكبيها. العناد يعني ان الطفل له شخصية. انتي مش بتربي حيوان اليف يطيع كل اوامرك و طلباتك
. الطفل بيعاند لانه بيقول انا لى شخصية و رأي وانتي نفسك عنيدة لما تعاندي قصاده
.وتيجي ام بعد كدا تقولي ابني بيرد عليا الكلمة بكلمتها، زعيق بزعيق، لدرجة انها وصلت للشتم..
ببساطة ابنك بيحذو حذوك!

أنتي الكبيرة العاقلة الناضجة اللي المفروض تحتوي ابنك و تقربي من وجهة نظره ،انتي مش على طول صح وهو عنده وجهه نظر هو شايفها صح ودورك انتي تشوفي اللي الطفل شايفه و تقدريه وتفهميه.
و ابنك مش متنفس غضبك و الكبت اللي انتي فيه
ابنك امانة من ربنا والله العظيم هاتحاسبي عليها اشد الحساب
انتي مش طالبة من الناس تقدر ظروفك و نفسيتك و اعصابك و انتي مش مقدرة ظروف و قدرات و احتياجات اقرب الناس واكثر الناس احتياجا لك
مافيش ام تقولي أصلي عصبية، أو أصل البت بتتحداني (والبت دي تكون سنتين ولا حاجة)
الواد بجح عينه في عيني و باقول له لا و يعمل اللي هو عايزه بردو.

الولد بيلعب في الطين مع انه عارف انه كخ. طيب كخ من وجهة نظر الكبار و لكن دا حاجة جميلة اوي من وجهة نظر الاطفال و ملمسه مثير للحواس و الاستكشاف وقولي كخ من هنا لبكرة مش هايسمع. عايزة تقولي له كخ اوجدي له البديل.. لاعبيه بالعجين، لاعبيه بمية و نشا عشان ملمسها ظريف، لاعبيه برمل نضيف عشان تشبعي غريزته.

اه و اخيرا و بالمناسبة الطفل ما يفهمش كلمة عشان الدنيا هاتتبهدل ولا هاتوسخ هدومك ولا الضيوف جايين. بالنسبة له اللي بتقوليه دا هراء،ما توضبي الدنيا وتغيري هدومي و يا اهلا بالضيوف.

.يا ريت تكوني واقعية في الحاجات اللي بتمنعي عنها طفلك و بتزعلي منه و بتعتبريه بيعاندك عشانها.

كتيب تنظيم المطبخ

Read More

اضطراب فرط الحركة و نقص الانتباه

مرة أخرى نتفق أن هذا المقال ليس للتشخيص على الاطلاق.. فالتشخيص أمر يقوم به أخصائي أو طبيب نفسي متخصص ولا نقوم به كأمهات في المنزل..

وكما ذكرت أن الهدف من نشر هذا الموضوع هنا هو أن نتوقف على إطلاق هذا اللفظ على أبنائنا بهذه العشوائية.. فليس كل طفل كثير الحركة هو طفل مصاب بفرط الحركة و تشتت الانتباه

و ذكر العديد من أطباء النفس أنه هناك شرطان لبدء التفكير في اضطراب فرط الحركة و قلة التركيز و الشرطين هما

1- أن تظهر الصفات (معظمها) على الطفل لفترة لا تقل عن ستة أشهر مع مراعاة عدم وجود تغييرات كبيرة في حياة الطفل مثل ميلاد طفل جديد / انفصال الابوين/ وفاة أحد افراد العائلة/ بعض الاطفال يتأثر بتغيير المدرسة أو تغيير السكن..

2- ان تظهر هذه الصفات في مكانين على الاقل.. أي مثلا في المدرسة والبيت ولا يجوز ان نطلق على طفل هادئ في المدرسة انه مصاب باضطراب فرط الحركة و قلة التركيز لأنه كثير الحركة في المنزل والعكس أيضا.

إضافة: بعض الاطباء و المختصين يصرون على أن يظهر هذا الاضطراب خلال السنوات العشرة الأولى من عمر الطفل

و هذا الاضطراب ينقسم الى ثلاث أنواع هي:

1- اضطراب نقص الانتباه

و هو لا يتضمن النشاط المفرط، بل على العكس يبدو الولد خمولا و بليدا بالإضافة الى انه يعاني من نقص فادح في الانتباه فهو لا يستطيع التركيز على عمله و يمضي معظم الوقت شاردا بعيدا عن الاجواء، يقال عنه الكسول

2- اضطراب فرط النشاط:

في هذه الحالة يكون الطفل نشيطاً جداً وسريع الانفعال لكنه لا يعاني أية مشكلة في الانتباه، إنه الولد الذي لا يجلس في مكانه في الصف أو في أي مكان ولكنه ذو مستوى دراسي جيد و هو يلاقي صعوبة في المشاركة في الالعاب و النشاطات الجماعية اذا لا يستطيع التقيد بقوانين اللعب أو النشاط مثل انتظار الدور أو التسمع الى آراء الاخرين

3- اضطراب نقص الانتباه و فرط النشاط

وهذا الولد لا يعير أ ي انتباه للدروس في الصوف او الواجبات المدرسية في المدرسة خاصة تلك المملة التي تحتوي على الكثير من التكرار، و هو يلاقي صعوبة كبرى في بدء عمله أو في انهائه لأن تركيزه ينتقل بسرعة البرق من شيء لآخر.


 

ما صفات هذا الطفل في المنزل:

1- لديه صعوبة في اتباع الارشادات و الأوامر الواضحة ونعني بكلمة لديه صعوبة أي أنه يريد و يرغب في ذلك ولكن كأن هناك قوى اكبر منه تدفعه دفعاً للتصرف بشكل آخر، فنراه يريد أن يكتب مثلاً ولكنه لا يستطيع إلا أن يتحرك.
2- لا يكمل أي نشاط (وهنا نعني أي نشاط بهذه المبالغة وبالتالي الطفل الذي يدمن التلفاز و الآيباد ويركز في اللعب فيهما ليس مصاباً بفرط الحركة )
3- يقاطع أحاديث الأسرة ولا يستطيع أن يختار وقت التعليق
4- لا يستطيع التركيز في أي لعبة أكثر من خمس دقائق (بما في ذلك الالعاب الالكترونية) و بعض الاطباء أطال هذه المدة إلى عشر دقائق
5- دائم التعرض لحوادث (سقوط .. كسور)
6- لا يستطيع أن يبقى في مكان فترة

ما صفات هذا الطفل في المدرسة:

1- لا يستطيع إنهاء أي عمل بدأ فيه

2- يؤدي الأعمال بلا مبالاة و إهمال
3- يعلق تعليقات غير مناسبة في الوقت غير المناسب
4- لا يستطيع الانتظار في الصف
5- لا يستطيع اتباع التعليمات كاملة
6- يقاطع المعلم بشدة أثناء شرح الدروس
7- يبدأ في الكلام مع الاطفال الاخرين في الاوقات التي تطلب الهدوء مثل حل المسائل
8- لا يستطيع الجلوس مكانه و إنما دائم التحرك في الفصل
9- ذكاؤه فوق المتوسط عادة ولكن لعدم قدرته على التركيز يكون لديه صعوبة في التعلم

ما صفات هذا الطفل مع زملائه:

– عدم القدرة على اتباع قواعد اللعب أو الاستماع إلى الاخرين

– لا ينتظر دوره أبدا في اللعب بسبب اندفاعيته
– يقدم على الانشطة الخطرة دون إدراك عواقب هذا التصرف
– كثير الكلام
– لا يستطيع اللعب في هدوء ولا الألعاب التي تطلب الهدوء مثل الشطرنج أو ألعاب الذاكرة
– ليس لديه أصدقاء في أحيان كثيرة

وأذكر حضراتكم بضرورة الاطلاع على الأسباب الأخرى التي قد تؤدي إلى نفس أعراض فرط الحركة و نقص الانتباه والتي تم نشرها في المقال الأول من هذه السلسلة.

ومن الجدير بالذكر أن تشخيص الاضطراب بشكل دقيق لا يعتمد على طبيب ماهر أو اخصائي متمرس فحسب، بل يعتمد بالشكل الأساسي على ملاحظة الأب و الأم في المنزل و ملاحظة المعلمة في المدرسة، فيجب أن يكون هناك حرص تام على الدقة و الموضوعية و الابتعاد عن المبالغة والتهويل، فعندما اقول للطبيب أن ابني لا يجلس.. فكلمة لا يجلس تعني لا يجلس تماما و دائم الحركة و تختلف عن كلمة ابني كثير الحركة.. وهكذا

ابنى شقى

كيف نتعامل مع طفل لديه نشاط زايد و تشتت في الانتباه؟

إن التعامل مع الطفل يكون عن طريق التقويم (العلاج السلوكي) و ذلك بالتعاون مع الأم و المدرسة و قد يكون هذا التدريب وحده كافياً ويستجيب له الطفل بعد مدة لا تقل عن شهر.. ولكن إذا ارتأى المعالج أنه يجب التدخل الدوائي في الحالة فلا بأس على الاطلاق و أيضاً يؤتي ثماره و يخفف معاناة الطفل و الأسرة و أكرر و أشدد أن هذا من اختصاص طبيب نفس أطفال.. ولا نعتمد على خبرات الامهات الأخريات فيما يخص العلاج الدوائي على الاطلاق.

وقد يكون العلاج الدوائي ضرورة في الحالات التالية:

– عدم تفهم المدرسة لهذه الصعوبة و عدم تعاونهم مع البيت

– اذا كان الأبوان ليس لديهما الاستعداد او القدرة على العلاج السلوكي
وسنفرد موضوعاً عن اجابة لسؤال هل العلاج الدوائي مفيد لابني.. ولكن اجمالاً نقول ان اغلب الدراسات اجمعت تقريباً على ان العلاج الدوائي وحده لا يكفي و لكن يجب ان يرافقه العلاج السلوكي.

العلاج السلوكي:

أهم هدف من هذا العلاج هو المساعدة في تقليل الاندفاعية و العدوانية و مساعدة الطفل على التركيز في عمله و هذا يحتاج إلى تعاون أفراد الأسرة و هذا يكون بالتالي:

1- يجب إشعار الطفل بالحب و أن هذا السلوك يمكن تغييره (يعني ما نقعدش نقول للولد ألفاظ زي انت شيطان ، مافيش فايدة منك، انت كرهتني في حياتي، حياتي بقت جحيم ) بل يجب اننا نقول للطفل انت بطل انت شاطر، معلش هانركز مع بعض، طيب تعالى نفكر سوا، و غيرها من الجمل التي تعطي للطفل الأمل في التغيير اما اذا شعر الطفل أنه حالة ميؤوس منها.. فستزيد الحالة بشكل كبير.

2- يجب أن يفهم جميع أفراد الأسرة أن الطفل لا ذنب له في هذه المشكلة و ليست كذلك ذنب الاسرة.. و لكن يجب ان نتعاون لحلها..

3- يجب أن نظهر للطفل اننا نحبه و نثق في قدراته

4- يجب وضع القواعد الأساسية في التعامل مع الطفل و كونوا ملتزمين بهذه القواعد طوال الوقت حتى سن المراهقة.

5- يجب الالتزام بقواعد العمل مع الطفل بطريقة روتينية مثل الاوامر و نظام الأسرة حتى لا يتشتت من اي تغيير جديد (وهنا نعني الروتين اليومي مثل وقت النوم وقت الوجبات الأساسية)

6- اذا حدث تغيير في هذا الروتين يجب تنبيه الطفل اليه مسبقاً و شرح ما سوف يتم مثلا عند الذهاب إلى السوبرماركت يجب أن نشرح للطفل ما سوف نفعله و أن نسند إليه بعض المهام مثل قيادة العربة و أنه بالتزامه يحق له اللعب أو شراء لعبة

7- وضع قائمة بالأعمال المنزلية التي يستطيع الطفل المساعدة فيها و في كل مرة يقوم بعمل مختلف لأن هذه الاطفال تحب التنوع في الأعمال (ويمكن أن تشمل القائمة : ترتيب السرير، تنظيف المائدة، المساعدة في المطبخ.. إلخ)

8- قد يكرر الطفل موضوعاً واحداً فقط في الحديث بطريقة قد تزعج الباقين.. حاولي المساعدة في تغيير انتباه الطفل بشيء آخر ثم ابدئي في الحديث عن الموضوع الجديد

9- إذا ما طلبت أمراً من الطفل يجب أن يكون الأمر بسيطاً و ليس مركباً بمعنى أن نقول له أحضر كوب ماء، ولا تقولي له اذهب لأختك لتأتيني بكوب ماء

10- الطفل ذو النشاط الزائد يجد صعوبة شديدة في متابعة تسلسل افكاره، ولذلك يجب مساعدة الطفل باستخدام الأسئلة مثل ماذا أين متى: بمعنى لو أنه يحكي عن شيء حصل في الفصل، مثلا يقول توجيهات المعلمة و يقول” / الميس قالت ان في رحلة و بعدين احمد قام اتكلم” ، هنا توقفه الأم و تقول له: مين الميس: فيجاوب و تسأله الرحلة لأي مكان؟ و يجاوب الطفل لأنه اذا لم نساعده لن نفهم ما يقول لأنه يفكر في اشياء كثيرة و في الغالب احنا بنعصب من اننا مش فاهمين الطفل و بنزعق و بس

11- توجيه اي اسئلة ا للطفل تكون بوجه بشوش و طريقة لطيفة

و هناك ثلاث كلمات مفتاحية تهم كل أب و ام في التربية عموما و خاصة و بشكل هام جداً لأولياء أمور الطفل الذي يعاني من نقص الانتباه و فرط النشاط، هي :

الوضوح و النظام و الشعور بالأمان

كيف تكون هذه الكلمات مفتاحاً لحياة افضل مع الطفل ذو فرط الحركة و نقص الانتباه..؟

وهذا ما سنعرفه في المقال الثالث ان شاء الله….

مصادري الاساسية في هذا المقال:
أولادنا من الطفولة و حتى المراهقة – ريتا مهرج
ملف الاستشارات – دعاء صفوت

مع خالص محبتي

دعاء صفوت

Read More

المراهقة – ملف كامل

* ما هي المراهقة
* أهم ميزات المرحلة على الجانب الجسدي
* بعض مميزات المرحلة على الجانب العاطفي
* النضج الجنسي
* كيف اهيء ابنتي للتعامل مع الدورة الشهرية
*كيف يهيء الأب ابنه للبلوغ وفترة المراهقة.
* تغذية المراهق


المراهقة

أغلب شكوى الأمهات بعد السنتين الأوليين من عمر الطفل و بعد مشاكل عناد الأطفال، هي عن فترة المراهقة، و انا مش عايزة اكتب كلام تقليدي عن المراهقة يتم التعامل معا هزي أي كلام صح بس ما بيجيش على هوانا، فنسمع ربعه و نرمي الباقي في الدرج، و بعدين نرجع نكمل وصلة الشكوى من اننا تعبانين اوي مع ولادنا اللي مطلعين عينينا و البنات البجحة اللي بقت ترد الكلمة بكلمتها.
بس خليني اتفق معاكم أولا ان مرحلة المراهقة ما هي إلا حصاد التربية في السنوات التي تسبقها، يعني إيه، احنا قولنا ان التربية هي عبارة عن زرع، حصد

اللي بنزرعه في مرحلة الطفولة المبكرة و المتوسطة بنحصده في مرحلة المراهقة، يعني إذا انا في مرحلة الطفولة احترمت رغبة الطفل في الاعتماد على النفس هايطلع مراهق بيتحمل المسؤولية، لو ربيت ابني على الحوار هايكون بيننا حوار و هو مراهق، لو ربيته على الاخترام هايحترمني
لو ربيته على الثقة هايثق فيها و يتكلم معايا

و بالمثل إذا انا ربيت على الضرب و الإهانة و الصراخ فإهلا و سهلا.. الطفل الصغير اصبح كبير يقدر يصرخ، ويعلي صوته زيه زيك، و يقدر يرزع الباب لو ما عجبوش كلامك و يقدر كمان يعلن تأففه منك و من زجرك الدائم له، و لما تكبري انتي و ابوه في السن شوية ، يقدر هو دلوقت يمد ايده ويضرب.. و حقيقي ربنا ما يكتبها على حد..
عشان كدا انا حقيقي باقول للامهات اللي لسة اطفالهم صغيرين ربوا صح من دلوقت..
و اما اللي عنده مراهقين و كان بيربي بأسلوب خطأ اعتقد ان الأوان نحاول نصلح الاخطاء اللي حصلت قبل كدا..و نتدارك ما يمكن تداركه..
بس بداية هابدأ بخصائص المراهقة و ميزاتها عشان نستعد لها او نفهمها لو احنا فيها، لأن الوقاية خير من العلاج، و بعدين هانتكلم في مشاكل المراهقة تباعا ان شاء الله.

في الماضي كانوا العلماء بيقولوا ان مرحلة المراهقة دي سيئة و مليئة بالمشكال و نوبات الغضب فقط، و كانوا بيفترضوا ان مهما كانت الظروف الاجتماعية فإن كل المراهقين متعبين بنفس القدر.
و لكن جت الدراسات الحدثية في القرن العشرين عشان تقول، لا يا جماعة صحيح ان التغيرات الجسدية و الهرمونية بتعمل في المراهق الأفاعيل، إلا ان التعامل مع المراهق بتفتح و بعيدا عن التشنجات، كلما قلت التقلبات المزاجية و نوبات الغضب الي بيم ربيها المراهق
اذا زي ما قولنا صحيح انها مرحلة مش سهلة، ولكن يمكن التعامل معاها و تقليل المشاحنات و الصراعات فيها، و أول حاجة تطمنا انها اسمها مرحلة، يعني فترة و هاتعدي، زي مرحلة التسنين، زي مرحلة تعلم المشي، مرحلة بتعدي وبتيجي مرحلة اخرى وراها مليئة بالحاجات الحلوة ان شاء الله.
و بعدين كلنا كنا مراهقين، و مرينا بكل الكلام اللي هانقراه في المقالات.. و يمكن في حاجات ما كناش فاهمينها، و لا اللي حوالينا كانوا فاهمينها ولو كنا فاهمين من زمان يمكن كان الحال اتغير.. و كانت اثار الكلمات اللي واجعانا دلوقت قل او اتغير.. او يمكن ما حصلش.
عشان كدا يلا بينا نفهم ايه اللي بيحصل في نمو المراهق :

أولا: النمو الجسدي:

من ناحية نمو الجسد فإن مرحلة المراهقة هي المرحلة التي نلاحظ فيها نمو سريع يشبه نمو الطفل في العامين الأوليين من عمر الطفل، ففي خلال سنوات معدودة نلاحظ تحول المراهق من طفل الى شاب و المراهقة من طفلة الى شابه،
تتميز المرحلة دي بعدم تناسق اجزاء الجسم مع بعض، و دا نتيجى لأن الجسم بينمو ابتداءا من الساقين و القدمين واليدين، و دول بينمو بسرعة وبعدين يجي نمو جذع الجسم.
عشان كدا بيكون شكل المراهق بالنسبة لنا غير متكافيئ، واعرفوا ان المراهق نفسه حاسس بعدم التناسق دا و قلقان انه ممكن ما يتغيرش شكله و يفضل على الحالة دي
و نتيجة النمو ايضا بيكون في شيء من عدم الاتزان في حركة المراهق، و خاصة الذكور، عشان كدا ممكن نلاقيه بيقع كتير او بيوقع الحاجات من ايديه، هو مش مستهتر، هو بجد بيشعر بعد الاتزان و محتاج يتعود على المقاسات الجديدة دي.

و من ناحية تانية بعض العلماء بيقولوا ان الفترة دي بيتسم فيها المراهقة والمراهقة بالميل الى الكسل و الخمول ، لعدة أسباب، احدها هو ان الجسم بيكون مركز في استغلال كل الطاقة للنمو، فبياخد كثير من طاقة الجسم لهذا الغرض، بالضبط زي الرضيع، اولا ايامه او اول اشهر بينام كتير لأن الجسم عايز يركز في النمو و اكتمال الاعضاء،

و بالضبط زي كدا لما بنتعب فالجسم بياخد الطاقة عشان يصلح الخلل اللي بيحصل و بنكون مهدودين و مافيناش حيل نعمل حاجة، ودا يقولنا ان المراهقين مش كسولين و خاملين.. و انا شخصياً أؤيد هذه النظرية بشدة.

ثانيا: النضج الجنسي:

في فترة المراهقة و كجزء من النمو بتنشط الغدد و بتشتغل على اعطاء كل من الذكر و الانثى الشكل الجسدي المميز له، وتبتدي تغيرات الصوت، و نمو الشعر .. ويليها بحبة صغيرة او كبيرة، اعلان الجسم عن اكتمال نمو اجهزته التناسلية، بالحيض لدى الفتيات او الدورة الشهرية، ودا بيكون في عمر من 11 إلى 14 سنة (قبل كدا بشوية او بعدها بشوية) و اذا تأخرت الدورة الشهرية عن 15 سنة يفضل اللجوء الى الطبيب.
اما الفتيان فبيكون اكتمال نضج اجهزتهم التناسلية بالاحتلام و دا بيحصل متأخر ما بين 13 إلى 16 سنة.
وحدث البلوغ هو من الاحداث الهامة الي لازم يتم تهيئة المراهقين ليها بالمعلومات الصحيحة، و ما تسبيهمش فرسية لخرافات الأصدقاء، وتهيئة يعني نمهد قبل ما يبلغو مش بعد، وطبعا احنا متفقين اننا وعينا تربويا عن حماية انفسهم من التحرشات الجنسية و علمناهم يحموا نفسهم ويحافظوا على خصوصية جسمهم اصلا. و ان لم يكن ارجو ان دا يتعمل في اقرب فرصة، و دا ابتداءا للاطفال من عمر سنتين
و يا ريت نسمع الفيديو :

طيب نمهد ازاي :

اولا البنوتات:

ابتداءا من سن خمس سنوات اصلا البنت بتبتدي تسأل هي ليه مش زي ماما وكبيرة، و احنا دورنا نفهمها هاتكبري و تبقي زي ماما و نجاوب على اسئلتها بوعي و شفافية
من سن 9 سنوات تقريبا و حسب النمو الجسدي للبنت، ابتدي اطمن البنت ان النمو الجسدي اللي بتمر بيه دا و التغيرات الشكلية اللي بتحصل لها ما هي الا كونها بتكبر و هاتبقى زي ماما ودايما احضنها و اتكلم معاها عشان هي عايزة تطمن،
وبعدين اختار وقت مناسب، انا فاضية فيه و مركزة مع بنتي و هي رايقة فيه، اقعد اكلمها بجدية و ود في نفس الوقت، اقول لها حبيبة قلب ماما كبرت وبقت شابة جميلة، بما اننا اصحاب انا عايزة افهمك اكثر عن نموك عشان في حبة تغيرات كدا هاتحصل الفترة الجاية وحلو اننا نكون عارفين المعلومات الصح
الفترة اللي انتي فيها دي جسمك بيطلع مواد كيميائية اسمها الهرمونات، دي المسؤولة ان صوتك يبقى شبه صوت الانسات الكبار مش زي صوت الاطفال، و ان جسمك يبقى شبه جسم الانسات الكبار، و الهرمونات دي اللي بتخليكي احيانا فرحانة اوي، او زعلانة اوي، بس اهم حاجة احنا نتعلم لما نكون زعلانين اوي نتكلم مع ماما او نرسم او نعبر عن اللي مزعلنا عشان نتعامل معاه
و من ناحية تانية فالأجهزة الداخلية في الجسم عندك بتنمو، ولما بيكتمل نموها بتيجي للبنات حاجة اسمها الحيض او الدورة الشهرية، هل انتي عارفة اي حاجة عنها؟…
المعلومات الصح بقى عن الحيض: هو عبارة عن بعض الدم بيخرج من المنطقة الخاصة او الحساسة عند البنوتة، دي حاجة طبيعية مش بتخوف عشان احنا جسمنا كل شهر بيتخلص من حبة الدم دول، الفترة دي بتستمر من 3 الى 7 ايام كل بنت غير التانية
و كمية الدم كمان بتختلف من كل بنت للتانية
واحنا في الفترة دي بنلبس حاجة اسمها الفوط الصحية، اللي طبعا هاريينا بيها اعلانات في التلفزيون، و انا بعد ما نخلص كلامنا هاعلمك بتتلبس ازاي و ازاي بنتخلص منها.
اللي بيحصل دا كله حاجة جميلة اوي و بتقول اننا بنكبر، ولكن للاسف في بنات بقى بتقعد تقول كلام مش حقيقي عنها فإنتي لو احتجتي اي معلومة عن الموضوع دا انا ماما صاحبتك و معاكي، و لو حتى انا مش عارفة الاجابة ممكن نسأل دكتورة على المعلومات الصحيحة
و على فكرة الفترة دي عادية انتي تقدري تتحركي و تخرجي وتلعبي رياضة و تاخدي دش عادي خالص مافيش اي حاجة، و الدكاترة كلهم قالو كداـ، مع ان تعرفي زمان كانو بيقولولنا ممنوع نلعب رياضة بس طلع الموضوع مش صح عشان كدا انا باقولك مش نسمع كل الكلام اللي بيقولوه احنا نسأل حد موثوق فيه
اه حاجة اخيرة يا حبيبة ماما، الحيض او الدورة الشهرية دي بيكون معاها شوية الم، لو شربنا حاجات دافية زي النعناع او القرفة بتروح و بنكون كويسين ان شاء الله، و طبعا بقى لازم نبعد عن الحاجات الباردة والبيبسي و الحركات دي عشان بتزود المغص حبة. و اصلا عشان صحتناوبعد الحيض انتي بقى بقيتي مكلفة رسمي بكل الحاجات اللي بتدربي عليها الفترة اللي فاتت من صلاة و صوم و كمان الحجاب..
و في فترة الحيض او الدورة نفسها احنا مش بنصلي و لا بنصوم دي رخصة من ربنا، بس لما بنخلص بنعوض الصيام انما الصلاة فلا خلاص مش بنعيدها
و بعد الحيض في حاجة اسمها غسل شرعي احنا هانتعلمه حبة حبة
و انا سعيدة جدا انك بنوتي الجميلة اللي كبرت.. و احضني بنتك اوي، و بصي في عينيها و قولي لها انتي اغلى صديقة عندي لانها محتاجة ثقة و محتاجة تشجيع و محتاجة حنان و اسأليها لو عندها اي سؤال..
و لأن تربية معظم الامهات اصلا كانت بتعتبر الكلام في الحاجات دي من التابوهات و مش بتعرف تتكلم فيها مع بناتها، يا ريت تتدربي على الكلام دا و تذاكريه كويس. عشان تقوليه للبنت بثقة و تديها شجاعة تتكلم معاكي، و ما تستسهليش و تقولي بنات اليومين دول عارفين اكتر من اي حد.. ماشي هم عارفين وممكن يكونوا خدو درس في العلوم عليه، عادي بس دورك تنبهي وتوعي.
اما بالنسبة للشباب بقى..فالقصة ايسر شوية، و يفضل طبعا ان الاب هو اللي يقوم بالجلسة دي.. على سن 12 الى 13 سنة تقريبا و يشرح فيها:

زي ما قولنا انت شاب ما شاء الله عليك، و هاتبتدي تكبر اهو عشان تبقى راجل زي بابا، في الفترة دي، هاتلاقي ايديك ورجليك بتطول، عادي عشان بقية جسمك ينمو معاهم و تبقى في بنية وجسم الرجال، و صوتك هايبقى خشن شوية وبعدين هايتزبط و يبقى شبه صوت بابا او عمو، هاتلاقي في زيادة في شعر الذراعين والقدمين و الابط و المنطقة الخاصة و دا كله عشان جسمنا بيفرز مواد كيميائية اسمها هرمونات هي اللي بتدينا الصفات اللي بتميزنا كرجال، و في الفترة دي العرق عندنا كرجال بيزيد عشان كدا لازم نحافظ على نظافتنا وناخد دش كل يوم عشان العرق لما بيتفاعل مع البكتيريا بيعمل ريحة مش لطيفة خالص و انت ابني النظيف دائما
اما عن العضو الذكري فهايبتدي يكبر، و دا عادي، وممكن في مرة من المرات و انت نايم تقوم تلاقي العضو افرز بعض السائل دا طبيعي و دليل انك خلاص بلغت. و الحاجة دي ربنا مديهالنا طبيعي عشان جسمنا يرتاح، ولما تقوم تلاقي كدا لازم نغتسل الغسل الشرعي اللي هاعلمهولك.
اللي بيحصل دا حاجة عادية اوي زي ما وانت صغير طلعلك سنان او اتعلمت المشي، احنا اصحاب لو عندك اي سؤال مهما كان غريب او فاكر اني مش هارد عليك انا هاجاوبك عشان ماحدش يقولك اي معلومة غلط لان الشباب بيحبو يقولو كلام كتير مش صحيح انا مصدرك و مرجعك العلمي لو احتجت اي حاجة
ونشرح للبنات والاولاد ان في المرحلة دي بيكون في شوية حبوب في الوش اسمها حب الشباب نقدر نعتني ببشرتنا باستخدام صابون طبي و نقلل من الحلويات و فترة و هايروح (لان المراهقين بجد بيهتمو بمظهرهم فوق تخيلكم )

وبكدا نكون شرحنا للولد وللبنت ايه اللي بيحصل لهم عشان يطمنو.. ويعرفوا ان دي مرحلة وطبيعية و هاتعدي وهايبقو كبار
وعشان يكون عندكم معلومات كافية لأي سؤال ارجو انكم تذاكروا الموضوع دا انا لقيته مفيد وواضح جدا، دا ليكم انتم يا اب و يا ام مش للابناء دلوقت خالص http://www.childclinic.net/pain/puberty.html

ثانيا: التغيرات الجسدية والعاطفية:

اغلب الدراسات بتقول ان في علاقة وثيقة بين الهرمونات الجنسية اللي بتكون نشطة في فترة المراهقة وبين التفاعل العاطفي عند المراهقين و مستويات الهرمونات المرتفعة خلال المرحلة دي بتسبب تقلبات مزاجية كبيرة على شكل غضب و اثارة وحدة عند الذكور و غضب و اكتئاب وحزن و نوبات بكاء غير مبررة عند البنات، و دا في الفترة من تسع الى14 سنة.

و دائما باقول لأم المراهق او المراهقة لما تشتكي من تقلباته المزاجية ان احنا الاناث نعاني من التقلبات المزاجية في فترة ما قبل الدورة الشهرية و بنعيط و بنعصب و حالتنا حالة، و بنشتكي في الاخر ان ماحدش مقدر الضغط اللي علينا، المراهق و المراهقة بيمروا بهذه الضغوط الهرمونية العصبية و لفترة اطول فالأولى اننا نتفهم الي بيحصل لهم و نقدر شعورهم.
ولكن للاسف أغلب الأهل لا يتفهم هذه التغيرات ولا يستجيب لها بالشكل المطلوب، عشان كدا بنجد ان المراهق بيحب يدور على خد يفهمه و بالتالي بيحب يروح لاصحابه كتير ويتكلم معاهم من باب كلنا في الهوا سوا.
و يفضل المراهقين بقى يشتكو نفس الشكوى و في كثير منهم يتمنى الاستقلال عن منزل اهله لكن اللي ماسكه او مانعه هو الحاجة المادية والاقتصادية. عشان كدا يا ريت نراجع انفسنا كويس.

تغذية المراهق:

نتيجة التسارع الكبير في نمو المراهق فإن الجسم بيحتاج الى 2700 سعر حراري
و المراهقة الى 2200 سعر حراري، ولكن للاسف في هذه السن العادات الغذائية السيئة بتكون احد مفضلات ابنك او بنتك فالبيبسي و البطاطس و السيبش بيكون صديقهم الصدوق.. و هنا بنقول ما تعمليش صدام، حاولي توصلي لتوافق معاه ان يا حبيبي انت مسموحلك بالاكلات السريعة مرتين في الشهر مثلا عشان صحتك، و
هنا انصح ان يتم مشاركة الاسرة في مشاهدة حلقات خواطر 10 حلقة الاكل السريع و اخطاره على القلب، و دا بشكل غير مباشر و بلاش نقعد على قلب الولد نقول مممم شفت اهو اللي باقوله صح
المراهق لا يحب التأنيب ولا المحاضرات، و الجملة دي هاتسمعوها مني مرارا و تكرارا، المراهق لا يحب التأنيب ولا المحاضرات.
سيبيه و هو هايدورها في دماغه … و بالحوار البناء نوصل للي احنا عايزينه.

مع خالص محبتي..

دعاء صفوت


المراجع:

– مشكلات الطفولة و المراهقة،أسسها الفسيولوجية و النفسية د.عبدالرحمن العيسوي
– الطفولة و المراهقة د. سعد جلال
– دكتور سبوك يتحدث إلى الأمهات
– دراسات في الطفولة و المراهقة : د. أحمد محمد عبد الخالق & د. مايسة أحمد
– المراهقون المزعجون د. مصطفى أبو السعد
– هكذا نربي د. مصطفى أبو السعد
– سيكولوجية المراهقة مجموعة مرلفين
– فن التعامل مع المراهقين د. ياسر نصر
– محاضرات و استشارات مسموعة للدكتور طارق الحبيب
– اولادنا من الطفولة حتى المراهقة ريتا مهرج
– كيف افهم المراهق د. عبدالرحمن بكار

Read More

ابني لا يجلس و لا يستمع إلي، لقد حول حياتي الى جحيم

ما هو فرط الحركة و تشتت الانتباه.. 

هو وصف للولد الذي يعاني مشاكل (بالغة) في التركيز و الانتباه كما في مستوى النشاط و الانفعال، و (هنا نشدد على كلمة بالغة لأن أغلب الأطفال بيمروا ببعض الفترات التي توحي بأنهم مصابون بفرط الحركة و نقص الانتباه

إذا.. متى أقول ان الطفل لديه نشاط زائد:
يظهر هذا الاضطراب السلوكي في حوالي العام الثالث من عمر الطفل، إلا أن هذه الشكوى تزيد من قبل الأهل و تصبح معاناة بدخول الطفل للمدرسة لأن المدرسة تتطلب التركيز و عدم الانفعال و الالتزام بالقوانين الصفية.

و يجب أن يظهر هذا الاضطراب في مكانين في نفس الفترة، مثلا في المدرسة و البيت، ولكن اذا ظهر في البيت فقط او المدرسة فقط يكون كثرة حركة طبيعية

و يجب أن نعلم أن وجود الطفل ذو فرط الحركة مع عدد كبير من الاشخاص و مكان جديد غير مألوف يزيد من تشتته و عدم تركيزه.

متى يكون هذا السلوك طبيعياً: 
هذا السلوك يظهر بشكل طبيعي في سن ما بين سنتين إلى ثلاث سنوات،
فهذه هي المرحلة التي يبدأ فيها الطفل بالمشي و الحركة و الاعتماد على الذات و تعد هذه مرحلة لحالة طوارئ نفسية تقتضيها مرحلة الانتقال من الاعتماد على الغير إلى الاعتماد على الذات.. مما يجعل التحكم في حركته أمر صعب و شاق إلى جانب أنه بطبيعة الحال قدرة الطفل على التركيز في هذه المرحلة محدودة.

حالات الاضطراب النفسي و التوتر أو نقص الحاجات النفسية: 
يعد ايضاً سلوك فرط الحركة و قلة الانتباه امراً طبيعياً بسبب الظروف العائلية مثل ولادة أخ جديد حصل على اهتمام الأسرة، أو فقدان أحد افراد العائلة و مرور العائلة بحالات طوارئ، فجسم الطفل يعد القناة الرئيسية للتعبير عن حالات الاضطراب النفسي او نقص في الاحتياجات النفسية. و هنا يجب ان افكر متى تحول ابني لهذا السلوك و احلل الاحداث المصاحبة وتقديم الدعم النفسي المصاحب له.

كذلك هناك فأن هناك بعض الامراض او الاسباب الاخرى التي تعطي نفس أعراض فرط الحركة و تشتت الانتباه و هي:
– الحساسيات.. الربو و الاضطرابات التنفسية عند الولد التي غالبا ما تؤثر على قدرته على التركيز و تؤدي إلى تصرفات تشبه فرط الحركة و نقص الانتباه

– مرض السكر أو هبوط مستوى السكر في الدم، أيضاً يؤديان إلى تغيرات في مستوى التركيز و النشاط عند الانسان

– اضطرابات السمع و البصر: فمن الواضح أن الولد الذي لا يسمع أو يرى جيداً ما يدور حوله في الصف قد يعاني من مشاكل سلوكيه أهمها النشاط المفرط

– النقص بعنصر الحديد يؤدي إلى مشاكل في الانتباه و سرعة الانفعال (كباراً وصغاراً)

– التسمم بعنصر الرصاص يؤدي إلى النشاط المفرط

– الأدوية و العقاقير: بعض الأدوية تتسبب بأعراض جانبية تشبه اضطراب نقص الانتباه و فرط الحركة (اكتشفت هذا الأمر مع أحد ادوية نزلات البرد التي تتناولها ابنتي)

– اضطرابات نفسية: إذا كان الولد يمر بفترة اكتئاب أو قلق متزايد بعد صدمة أو أزمة معينة في حياته فإنه قد يتصرف بشكل يوحي بالنشاط المفرط و نقص الانتباه

– مشاكل مدرسية: إذا كان الولد يعاني من الملل في الصف أو من أحد صعوبات التعلم مثل (صعوبات القراءة أو الكتابة او الرياضيات) فقد يلجأ الى اثارة انتباه المحيطين بواسطة سلوك شبيه بسلوك النشاط المفرط

– اضطرابات الغدة الدرقية : إن التغيرات الحاصلة في الهرمونات المفرزة من الغدة الدرقية تؤثر على النوم و العواطف و الحركة عند الانسان و قد تؤدي إلى تصرفات شبيهة بالنشاط المفرط و النقص بالانتباه عند الطفل

– اضطرابات النوم و الشخير بحيث لا يستطيع الطفل النوم بعمق فيؤثر هذا بشدة على التركيز و الانتباه

ولهذا من المفيد جدا ان اكون على اطلاع بهذه المعلومات و ان استشير طبيب اطفال مؤتمن لاجراء التحاليل الاساسية لفقر الدم و السكر والغدة الدرقية و تحليل سمية الرصاص في الدم.. لاستبعاد أي اسباب عضوية تعطي نتيجة مشابهة لسلوك فرط الحركة و قلة التركيز

الخطوات العلاجية و عوامل تحسن في تحسين التركيز للاطفال الذين يتصفون بزيادة الحركة و نقص الانتباه او اي منهما على حدة.. ليس الاضطراب فقط بل اي طفل يتصف بهذه الصفات لأي من الأسباب المذكورة أعلاه
1- التشاور و التباحث مع المدرسة. في بعض الأحيان يكون الطفل طبيعياً جداً في البيت و لكن تأتينا شكاوى كثيرة من المدرسة بشأن عدم تركيزه او كثرة تحدثه مع من حوله، و للأسف الشديد فإن الكثير من المعلمات و المعلمين لا يقدمون حلولاً للأسرة بل يرسلون للأسرة الشكوى وفيها رسالة تعني (تصرفوا مع ابنكم) مع ان المعلم يجب ان يكون على دراية بهذه الأمور و يجب ان يقدم حلولا أيضا.. ولكن اذا قدم لكم المعلم الحلول المقترحة كان بها و شكرا له.. أنما اذا اكتفى فقط بالشكوى فنصيحتي ان تطلبوا من المعلم ما يلي:

– زيادة تشجيع الطفل في الصف و التوقف عن الصراخ او نعته بصفات سيئة
– ان يجلس الطفل بمقعد قريب من المعلمة بحيث تحثه على زيادة التركيز
– ارسال تقرير يومي مبسط جدا عن سلوك الطفل في المدرسة لتتمكن الام من التشجيع في المنزل او تقويم السلوك
– التقليل من الانشطة الكتابية قليلا و الاعتماد مع هذا الطفل على الانشطة الحسية لتثير انتباهه

2- مراقبة الضغوطات داخل المنزل: و العكس هنا اذا كان الطفل يعاني من هذه المشكلة في المنزل و لكنه في المدرسة طبيعي، فقد يكون هذا نتيجة ضغوط معينة في المنزل، مثل تكرار الخلافات الزوجية أمام الاطفال، الطلاق، حتى احيانا الانتقال من منزل لآخر قد يؤثر على الطفل بهذه الطريقة. و يقترح الاخصائيون هنا زيادة الوقت الذي نقضيه مع الطفل و منحه فرصة اكثر للتعبير على مشاعره و ابداء تقديرنا لهذه المشاعر

3- كما قلنا أعلاه يجب فحص حاستي السمع و البصر،

4- زيادة التسلية و الترفيه: مثل الرسم و التلوين و حتى في الدراسة يجب ان نبتكر للطفل ما يجذب انتباهه فمثلا بدلاً من الكتابة على الدفتر لتعلم الحروف مثلا يمكن ان نكتب على السبورة او نكتب على لوحة كبيرة بلون مميز، كذلك اللعب بالمعجون و الصلصال له اثر طيب، كذلك يمكن تعليم العد و الالوان عن طريق القاء الكرات الملونة في سلة .. و في الفترة القادمة ان شاء الله سننشر العديد من الانشطة المناسبة لهؤلاء الاطفال.

5- تغيير مكان الطفل وقت المذاكرة: لا يجوز ان اطلب من الطفل المصاب بتشتت الانتباه ان يكتب واجبه بجواري على الكنبة في غرفة المعيشة حيث التلفاز و حيث انا أحملق في جهاز المحمول، طبيعي انه سيتشتت، يمكن بسهولة تخصيص مكتب يواجه الحائط بدون اشياء كثيرة فوق المكتب حتى لا تلهيه، و ان اكون الى جواره للتذكير و التنبيه ومن ثم يمكن تدريبه اني سأغيب قليلا ثم أعود..

7- الاطلاع على موضوع تمارين زيادة التركيز كنت قد نشرته في الصفحة هنا منذ فترة قصيرة

8- الحرص على التواصل البصري مع الطفل لأن هذا يرفع من نسبة تركيز الطفل في التعليمات التي يأخذها بنسبة تزيد عن الخمسين بالمئة، فلا تطلبي من طفلك ان يفتح الباب و انتِ في المطبخ فهو غالبا لن يسمعك، بل اذهبي له و انزلي لمستوى عينيه و تواصلي معه بصريا

9- حددي كلامك جيدا: في كل مرة اتكلم فيها عن التربية و القواعد و التعليمات اشدد على أن يكون الكلام واضحاً و ان اقول للطفل ما أريده منه لا ما اريده التوقف عنه، مثلا لا ينبغي ان اقول للطفل (لا تلعب كرة في الصالة) بل يجب ان اعطي البديل لأن الطفل بحاجة لأن يلعب، و في المقابل يجب ان اطلب من الطفل ان (العب الكرة في الفناء او في غرفتك ) و بهذا لا يتشتت الطفل في كثرة الكلام.

10- توقف عن الاسئلة المملة: (ماذا فعلت في المدرسة اليوم) سؤال لا يناسب كل الاطفال لأن ليس كل الاطفال لديهم نفس القدرة على سرد الاحداث، ممكن أن تسألي، ماذا درستم في اللغة العربية اليوم، هل قرأت المعلمة قصيدة الربيع..

و اذا كان طفلك لا يجد جواربه، لا تقولي له (الا تستطيع ان تجد جواربك؟) فهذا سؤال يعبر عن سخطك انتي ولا يفيد الطفل باي شيء

11- تقديرالطفل و التحفيز على المحاولة: الطفل قليل التركيز غالبا يمل بسرعة ولا يود المحاولة كثيراً بعض الكلمات التشجيعية منكم لها مفعول السحر( أنت بطل، أثق أنك ستكتب هذه الصفحة جيدا، أعلم انك عبقري) و طبعا بدون مبالغة و كذب نحن نتحدث عن أشياء أساسية.
12- وضع نظام و روتين محدد و الالتزام به، و تكلمنا في هذا الشأن في موضوع التربية بالقواعد. يرجى الاطلاع عليه

13- بعض الاطفال يحتاج ان يظل ينفس عن طاقته و هو يدرس ممكن الاستعانة بالكرة الاسفنجية و نعطيها للطفل يضغط عليها و هو يدرس (ابني علي كان يسمع لي العلوم و هو يقفز على السرير الى ان اشتريت له ترامبولين و اصبح اللعب عليه اساسي لتفريغ الطاقة)

14- التقليل من السكريات: (هذا النص منقول من كتاب اطفال مزعجون للدكتور مصطفى أبو السعد) كثير من الأبحاث لا تحذر من السكر كثيراً ولكن يرى بعض المختصين أنه يجب على الاباء تقليل كمية السكر التي يتناولها الأطفال، فبعد تشخيص ما يقارب من 1400 طفل وجد حوالي ثلث الأطفال يتدهور سلوكهم بشكل واضح عند تناولهم الأطعمة مرتفعة السكريات/ و أثبتت بعض البحوث أيضاً أن الطعام الغني بالبروتين يمكن أن يبطل مفعول السكر لدى الأطفال الحساسين له.. لذلك إذا كان طفلك يتناول طعاما يحتوي على السكر فقدم له مصدر بروتين كاللبن أو البيض أو الجبن. اما بالنسبة لتجربتي انا العملية فالسكر يزيد من نشاط ابني و بنتي بشكل سلبي ويجعل ردود افعالهم اكثر انفعالية كما أنه يؤثر على نوعية نومهم، لذا وضعت لا سكر بعد الساعة السادسة مساءا حتى اتجنب هذه السلبيات، و في نفس الوقت فممنوع تناول الحلويات و الشيبس و الشكولاتة الا يوم واحد فقط في الاسبوع و يمكن ان اشغلهم ايضا عن هذا اليوم و لم يعد ضروريا.. المشروبات الغازية ممنوعة تماما و الحمد لله استطعت ان اجعلهم يكرهونها بالتجارب العملية و الافلام التعليمية من اليوتيوب.

15- قد يفيد أن نجعل الطفل يعيد التعليمات التي نقولها له للتأكد من أنه فهمها بشكل تام و استوعبها و طبعا نشدد على التواصل البصري

16- يساعد بشدة ان نتعلم نحن تقنية الخارطة الذهنية في التفكير و المذاكرة و نعملها لأبنائنا.

17- التغاضي عن بعض تصرفات الطفل ما دامت لا تؤثر على أمنه و سلامته، فلا بأس ان يتحرك كثيرا في البيت ما دمنا نؤمن له المكان

Read More