ملاحظات هامة على حفظ وتخزين الأدوية

قدمتها: د/ سوزان سمير

نتعامل كثيرا مع الأدوية وحفظها بصورة تقليدية وقد تكون خاطئة أحيانا، وقد لا نعلم أن الأدوية تختلف من نوع لآخر فى طريقة الحفظ ومدة الصلاحية وغيرها من الأمور. وهذا الأمر فى غاية الخطورة حيث يعتبر الدواء هو المنقذ للإنسان وإذا لم يتم حفظه جيدا قد يتحول إلى العكس تماما.

إليكم بعض الملاحظات التى يجب مراعاتها عند حفظ وتخزين الأدوية المختلفة:



قراءة ورقة الإرشادات:

تحتوى هذه الورقة الت تأتى مع كل دواء على معلومات فى غاية الأهمية ومن الضرورى جدا إلقاء نظرة عليها خاصة إذا كان الدواء يستعمل لاول مرة. قد يذكر فى الإرشادات ضرورة خاصة للتخزين فى درجة حرارة معينة أو الرج قبل الإستعمال أو إحكام الغلق أو مدة محددة للصلاحية.

download

مكان التخزين:

  • يجب أن يكون مكان تخزين الأدوية جاف وبعيدا عن الشمس أو الحرارة العالية ولذلك لا يجب إطلاقا حفظ الأدوية فى السيارة مثلا حيث الارتفاع المستمر فى الحرارة (الموتور- الركن فى الشمس) والذى يؤثر مباشرة على الدواء.
  • كذلك لا ينصح بالتخزين فى دورات المياة حيث تتغير درجة الحرارة فيها باستمرار بالإضافة إلى أنها أماكن تكثر فيها الجراثيم.
  • بعض الأدوية (كاللبوس والمراهم) يذكر أن تخزن فى درجة حرارة الغرفة، ولكن فى أيام الصيف الشديد تعلو درجات حرارة الغرف عن المعدل الطبيعى وهو (25 -27 درجة) وهنا يجب وضع هذه الأدوية فى الثلاجة (تخصيص علبة خاصة ومغلقة للأدوية التى سيتم حفظها فى الثلاجة )
  • من الطبيعى والمعروف هو عدم حفظ الأدوية قريبا من متناول الأطفال ، ولكننا ننسى أحيانا أن درج الكمود أو التسريحة قد تصل يد الأطفال إليه، وهنا وجب الحرص الدائم.
  • الأفضل لمكان التخزين هو وجود صيدلية (ضلف تعلق على الحائط) فى مكان جيد التهوية وبعيد عن متناول الأطفال.
  • بعض الأدوية قد لا تكون خاصة بالشرب أو التناول بالفم وهنا لا يجب وضعه مع أدوية الشرب ولا فى صيدلية الأدوية إطلاقا حتى لا يستخدمه شخص بالخطأ (زجاجة دهان الكالاميل ) (ليسيد لوسيون القضاء على حشرات الشعر فهذا يعتبر مبيد حشرى)

IMG_0472

تنظيم المحتويات: 

  • وأخيرا يجب تنظيم ما لدينا من دواء حسب النوع فتكون مثلا المراهم معا والأقراص مع بعض و أدوية الشراب مع بعضها بحيث لا يغطى أحد الأدوية الآخر فيختفى عن نظرنا ولذلك نجد أن خزانات الأدوية التى تباع تكون محدودة العرض (العمق) حتى يكفى الرف لعلبة واحدة فقط.
  • التنظيم داخل الخزانة له عدة طرق: كاستخدام الباسكت أو العلب لكل نوع من الأنواع ويمكن الاستعانة بوحدات الأدراج البلاستيكية الصغيرة وإضافتها للخزانة إن أمكن.
  • يجب حفظ الأدوية كلها فى مكان واحد أى لا نترك بعضها فى الغرفة أو بجوار السرير وهكذا حتى يمكننا ايجاد ما نبحث عنه بسهولة.

تنظيم الأدوية

فى المرة القادمة التى تذهبى فيها إلى الطبيب، القى نظرة سريعة أولا على ما هو موجود لديك من دواء حتى لا تكررى شراء نفس العبوة مرة أخرى قبل انتهاء الأولى.

لطباعة ورقة متابعة الأدوية اضغط هنا:

 

ملاحظات هامة على حفظ وتخزين الأدوية

 

Read More
العروض الشهرية

جميع عروض السوبرماركت فى مصر

عروض القاهرة والأقاليم وأسواق الخضر والفاكهة

 

www.tsawq.net



عروض أكبر السوبرماركت وعناوين فروعها

 

عروض نت

 

www.3orod.net

 

عروض ايجى

 

www.3orodegy.com

جميع عروض السوبرماركت فى مصر 

 

Read More
خطوات تنظيم الدرج

خطوات تنظيم الدرج

قامت احدى المتدربات بالبرنامج بمشاركتنا الخطوات التى اتبعتها لتنظيم أدراجها بالصور بعد أن أتمت حضور ورشة عمل تنظيم البيت والحياة.

1- الدرج قبل التنظيم

خطوات تنظيم الدرج

2- تنظيف الدرج وفرشه
خطوات تنظيم الدرج

3-فرز المحتويات

4- جمعت أدوات التجميل فى حقيبة خاصة

خطوات تنظيم الدرج

5- ده اللى استطاعت ان تتخلص منه لانتهاء الصلاحية او عدم الحاجة

خطوات تنظيم الدرج

6- تنظيم الدرج باستخدام وسيلة مساعدة وهنا كانت مقسم الأدراج البلاستيك

خطوات تنظيم الدرج

نشكر مديرة البيت أية محسن على مشاركتها وفى غاية السعادة من استفادتها من الورشة ونتمنى للجميع حياة منظمة دائما.

 

Read More
التحرش الجنسى للأطفال

كيف نحمي أبناءنا من التحرش الجنسي

فيديو مسموع من تمانية وتلاتين دقيقة للمستشارة الأسرية: دعاء صفوت 

جمعت فيه معلومات شافية ووافية عن موضوع التحرش الجنسي وازاي اعلم ابني يحمي نفسه من التحرش بألعاب و اساليب عملية

مش مجرد كلام نظري

دا بالاضافة لمعرفة يعني ايه تحرش جنسي بالاطفال، ومن هو المتحرش الجنسي بالاطفال، و اعمل ايه لو لا قدر الله عرفت ان ابني او بنتي تم التحرش بهم

موضوع هام حقيقي ويستحق منكم التفرغ لسماعه هذه الدقائق

 

كيف نحمي أبناءنا من التحرش الجنسي

Read More
الأب والإبن

الضرب مش هايخليه راجل!

بقلم المستشارة الأسرية: دعاء صفوت 

عزيزي الأب

بص يا سيدي..الرسالة دي هاتوصلك انهاردة عشان زوجتك نفسها تقولك كلمتين بس مش عارفة ترتبهم ترتيب منطقي يقنعك، فأنا وهي(من خلال آلاف الاستشارات والله) هاناخد من وقتك دقائق عشان ابنك .. اللي احنا متفقين ان مافيش اغلى منه عندك

القسوة والعنف في التربية مش بتطلع الطفل راجل و مش هاتخليه يتحمل مصاعب الحياة، هي بس هاتخليه يتعقد و يمكن يكرهك ويكره نفسه ويتعلم يكذب بشكل اكثر اقناعا

القسوة والعنف بتقول للطفل انه مش محبوب و انه فاشل و لو صدق انه فاشل هايطلع فاشل و انت اكيد مش عايزه فاشل دا انت عايزه احسن الناس

القسوة والعنف و الضرب بتؤذي الطفل نفسيا بشكل انت عارفه.. عشان ما كنتش بتبقى مبسوط و انت بتنضرب و انت صغير و مش دا اللي طلعك راجل..

اللي بيصنع الرجال هو تحمل المسؤولية وانك تخليه يتحمل عقبات و توابع قراراته

و طبيعي ان الطفل يغلط والله دا طفل

و لما الطفل بيغلط مش بيبقى قصده يهينك او يقلل من قدرك او بيقلل من احترامك بالعكس هو طفل و لازم يغلط عشان يتعلم.. و لازم نعلمه عشان ما يغلطش تاني و لو غلط تاني نعلمه و لو غلط تاني نعلمه دا دورنا كأهل مسؤولين

والطفل مش لازم يخاف منك بل لازم يحبك ويحترمك، هو دا اللي يخلي اخلاقه رائعة في حضورك و في غيابك

لو خاف منك هايخبي عليك ولو خبى عليك ممكن تحصل بلاوي في فترة المراهقة مش هاتعرف عنها حاجة،

و انت اكيد مش عايز دا لابنك

الاب مش اشكيف الاب مربي و صديق و حنون

و اختم معاك بمعلومتين

بالنسبة للي بيقول الرسول اباح الضرب.. اسمع يا سيدي الرسول صلى الله عليه وسلم لم يضرب طفلا ولا خادما قط

و الضرب في الشرع (علموا اولادكم الصلاة لسبع، و اضربوهم عليها لعشر)

و انت راجل و ذكاءك الرياضي اعلى مننا نحن معشر النساء احسب معايا

عشان اعلم طفل الصلاة (وهي عماد الدين و هي ما شرع لأجله الضرب – دا بفرض انه مباح – ) الصلاة عشان اعلمها

لازم ادرب يعني اعلم يعني اشتغل و ابذل مجهود كام مرة بقى: 5 صلوات في اليوم × 365 يوم في السنة × 3 سنوات تطلعلها فوق الخمس الاف مرة

يعني لازم قبل الضرب تكون علمت الطفل تحديدا 5340 مرة و بعدها تضرب

فهل تعتقد ان كدا في مجال حقيقي للضرب؟

و التعليم عند سن سبع سنوات و الضرب بعد عشر سنوات

يعني الطفل اللي عنده خمس وست سنين و حتى عشر سنين مش حمل ضربك

انت راجل كبير و ناضج

و لازم تعرف قبل ما تضرب هل انا باضرب عشان انا غضبان ولا عشان اعلم الطفل حاجة

لو غضبان اتعامل مع غضبك لو سمحت

لو عشان تعلم الطفل حاجة مش بالضرب في اساليب تانية كتيرة ترغيب و تشجيع و بعدين حرمان من حاجة بيحبها بس بتحافظ على كرامته

الكرامة هي اللي هاتخليه راجل

انه يشوفك راجل هايخليه راجل

انت أب رائع.. و زوجتك أم رائعة محتاجة حبة تفهم عشان خاطر ابنكم ..

**************************

و تذكر أرجوك

(ولو كنت فظاً غليظ القلب لانفضوا من حولك) صدق الله العظيم

***********************

و ملحوظة كالعادة لعزيزتي الأم

بالراحة و بالتفاهم المعلومة الصحيحة هاتوصل.. انتي بس استمري في الابتسامة و منح الحب.. صدقيني الحياة هاتكون احلى

الضرب مش هايخليه راجل!

Read More

مقسم الأدراج

 

5

تباع فى شكل ثلاث شرائط بلاستيكية

تباع فى شكل ثلاث شرائط بلاستيكية

تدخل واحدة بداخل الأخرى لعمل التقسيم المطلوب

تدخل واحدة بداخل الأخرى لعمل التقسيم المطلوب

يمكنك قصها بالمقص العادى حسب مقاس الأدراج

يمكنك قصها بالمقص العادى حسب مقاس الأدراج

مقسم الأدراج متوافر فى ايكيا باسم HÖFTA ويتكون من 3 قطع بحوالى 39 ج مصرى

Read More

الطفل العنيد..المعاملة والعقاب

بقلم: دعاء صفوت

اكاد اكون ما قابلتش ام الا وهي بتشد شعرها من عناد اطفالها في السن دا.
و للاسف الشديد جدا أجد أمهات بتضرب اطفال في السن دا عشان  عنيد و عايز يمشي اللي في دماغه !!.

طيب خليني أقولك يا أم العنيد هنيئا لك بابنك.. عناد الطفل في هذا السن يعني ولله الحمد انه لا يعاني من التوحد ولن يعاني منه
و دا مش كلامي والله دا كلام دكاترة تربويين كبار أفتو بأن العناد حاجة إيجابية.. اه والله حاجة ايجابية زي ما باقولك كدا

و انه اعلان الطفل لاستقلاله والطفل بيقول انا كائن حي لي شخصية و طلبات و ان الطفل كلما كان عنيدا في الصغر كان قوي الشخصية مستقل في الكبر
يعني مش اي مجموعة اصدقاء سوء هاتلعب بدماغ ابنك

ولكن المشكلة فين بقى؟ المشكلة في الامهات اللي بتحط راسها براس الطفل و تعتبر انه عشان يبدو عليه انه فاهم فهو بيعاند غيظا فيها و نكاية بها هي الام المسكينة و تلاقيها تتشال و تتحط و تصرخ في كائن صغير بيمارس حقه الطبيعي في النمو

العناد مرحلة زي التسنين كدا وزي الفطام، لو تعاملنا معاها صح هاتعدي و خلاص لكن لو حاولنا نكسر الولد عندي حل من اتنين :

  • يا اما الطفل هايتستلم و يبقى طفل جبان خواف عديم الشخصية و يلجأ عقله للعناد السلبي.. يعني هو مش هايقولك لأ ولا يعاندك بس جسمه بيعاندك فنلاقي تأتأة، تبول لا ارادي، عنف، قرص و ضرب و عض
  • او الطفل هايكون شخصية قوية و يتسمر في العناد و يتعلم منك انتي طالما بتعاندي قدامه ان العناد سلوك مقبول ويعاند قدامك اكثر و هنا يتحول العناد من مرحلة الى صفة هاتعاني منها كتير بعد كدا

و العناد بيبدأ من سنة ونص الى سنتين ويختفي عند الثلاث سنوات تقريبا اذا تم التعامل معاه صح وعلى اساس الحوار واساس الخيارات وعدم الصراخ والضرب
ويرجع تاني عند سن الخمس سنوات، وهو عناد ليه، يعني الطفل بيعاند عشان عايز يفهم كل حاجة ليه ليه ليه، و هنا للاسف بعض الامهات بتزهق و تبتدي تقابل ليه الطفل بصراخ وان الطفل كدا بيعاندها ومش بيسمع الكلام ثم يختفي عند الست سنوات تقريبا ويرجع تاني بقى في ازهى صوره في سن الثمان تسع سنوات و يكون تمهيد لمرحلة المراهقة.. اللي العناد فيها شعار كبير اوي

كيف أتعامل مع الطفل العنيد؟

في السن الصغير اللي هو سنة وشوية سنتين، مطلوب مني اني اتقبل عناد الطفل و بلاش اصغر عقلي و حطي نفسك مكان الطفل، هو دلوقت سمة من سماته انه عايز يستكشف الدولاب، و انتي قولتي له لا. لأ بتاعتك عشان الدنيا ما تتبهدلش وانتي مش كل شوية هاتوضبي الدولاب و يا لهوي و يا خرابي
و الطفل عنده غريزة بتقول له استكشف عشان تنمو لازم تستكشف فيروح الطفل عند الدولاب تاني وانتي بقى يا ماما يا عاقلة تعتبري هذا الطفل الصغير بيتجرأ و يعصى اوامرك، و تقومي مزعقة و تقولي له انا قولت لا
طيب تشرفنا.. انتي ماما وانا الطفل اللي بينمو.. غريزتي مفهومة بالنسبة لي عن اللا بتاعتك دي.

يقوم الطفل يبصلك و يضحك.. في محاولة منه لاستعطافك او محاولة تغيير رايك.. مش محاولة لاغاظتك و تحديكي والله العظيم الطفل اكثر براءة من الفكرة المريضة دي. يضحكلك و يروح عند الدولاب. ويفتحه و يبهدل الدنيا

و انتي ترجعي تلاقي الهدوم في الارض تصابي بسكتة قلبية عشان الدولاب اتبهدل وهذا الكائن الصغير في ركن الدولاب تحداكي و كسر اوامرك وغاظك ونرفزك و انتي دلوقت غضبانة ومش شايفة وكل اللي بتفكري فيه هو تأدبي الولد دا ازاي ؟ !! لا في الواقع هو انتي بتفكري تنتقمي ازاي
و تقومي مصرخة وطراااااخ ضاربة الولد !! طب حطي نفسك مكانه: هو عايز يتسكشف ..ما ارتكبش جريمة.

كان الاولى بك لما تشوفيه بيحوم حوالين الدولاب انك تبادري و تفتحي الدولاب و تفرجيه على الهدوم بدل ما انتي شغلتي اسطوانة لا.. و انا قولت لا
و لو ما عملتيش كدا و سبتيه لما بهدل الدنيا و قولتي له يساعدك في ترتيب اللي بهدله هايتعلم
.و لو اصلا سبتي ليه ضرفة شوفونيره فاضية و حطيتيله العاب يفتح و يلعب بدون بهدلة يبقى احسن و احسن و احسن
.في بدائل كتير بدل موجة الغضب العارمة اللي عملتيها

الطفل العنيد مش طفل شرير عايز يؤذيكي بينما غضبك و عصبيتك بتؤذيه
حاسة انك مضغوطة و هاتهبي فيه، ما تاخديش رد فعل ، روحي الحمام اغسلي وشك و ارجعي بهدوء.  افتكري دائما انك كدا لو ضربتيه انتي بتهدمي شخصيته و استكشافه و بتعرضيه لعناد اكبر ولعلمك الطفل باله اطول مننا احنا فانتي اللي هاتخسري.
كمان بدل ما اقول للطفل البس التيشرت الاخضر وهو يصمم على الجاكت الكحلي الشتوي في عز الصيف، .انا اطلع له الحاجات المسموح انه يلبسها يعني اخليه يختار ضمن خياراتي، و كدا انا اكسب و هو يكسب

و بدل ما اقوله تعالى كل، فيقول لا.. احول السؤال لاختيارات، هاتاكل مكرونة ولا رز، و بالتالي لأ العندية ما بقتش خيار.

الموضوع عايز ذكاء وقوة شخصية، لأن فقط الشخصيات الضعيفة هي اللي مش بتقدر تتحكم في غضبها لدرجة ممكن تؤذي بها فلذات اكبادها.  اما بقى الحجة الاسخف في الكون ..أصله بيحرجني قدام الناس! عشان الناس هاتدمري ابنك؟ عشان كلام الناس هاتدمري شخصيته؟ عشان كلام الناس هاتخليه جبان و خواف و مهان الشخصية..؟
.هنيئا لك الناس

 ايه الحاجات الي بتخليكي تفكري تضربي او تعاقبي طفلك خلال اول سنتين من حياته؟

لو فكرت شوية تلاقيها كلها تصرفات طفولية لا تستدعي كل هذا الغضب و انك عشان هي مضغوطة بتزعقى.
فى أول سنتين من عمر الطفل لا يجوز معاقبة الطفل، فقط مدح السلوكيات الايجابية و اكررها للطفل عشان يعرف ايه الحلو اللي عمله و يعمل زيه تاني و اشجع و اشجع.

الاطفال في السن دا كتلة من الطاقة لازم تواكبيها. العناد يعني ان الطفل له شخصية. انتي مش بتربي حيوان اليف يطيع كل اوامرك و طلباتك
. الطفل بيعاند لانه بيقول انا لى شخصية و رأي وانتي نفسك عنيدة لما تعاندي قصاده
.وتيجي ام بعد كدا تقولي ابني بيرد عليا الكلمة بكلمتها، زعيق بزعيق، لدرجة انها وصلت للشتم..
ببساطة ابنك بيحذو حذوك!

أنتي الكبيرة العاقلة الناضجة اللي المفروض تحتوي ابنك و تقربي من وجهة نظره ،انتي مش على طول صح وهو عنده وجهه نظر هو شايفها صح ودورك انتي تشوفي اللي الطفل شايفه و تقدريه وتفهميه.
و ابنك مش متنفس غضبك و الكبت اللي انتي فيه
ابنك امانة من ربنا والله العظيم هاتحاسبي عليها اشد الحساب
انتي مش طالبة من الناس تقدر ظروفك و نفسيتك و اعصابك و انتي مش مقدرة ظروف و قدرات و احتياجات اقرب الناس واكثر الناس احتياجا لك
مافيش ام تقولي أصلي عصبية، أو أصل البت بتتحداني (والبت دي تكون سنتين ولا حاجة)
الواد بجح عينه في عيني و باقول له لا و يعمل اللي هو عايزه بردو.

الولد بيلعب في الطين مع انه عارف انه كخ. طيب كخ من وجهة نظر الكبار و لكن دا حاجة جميلة اوي من وجهة نظر الاطفال و ملمسه مثير للحواس و الاستكشاف وقولي كخ من هنا لبكرة مش هايسمع. عايزة تقولي له كخ اوجدي له البديل.. لاعبيه بالعجين، لاعبيه بمية و نشا عشان ملمسها ظريف، لاعبيه برمل نضيف عشان تشبعي غريزته.

اه و اخيرا و بالمناسبة الطفل ما يفهمش كلمة عشان الدنيا هاتتبهدل ولا هاتوسخ هدومك ولا الضيوف جايين. بالنسبة له اللي بتقوليه دا هراء،ما توضبي الدنيا وتغيري هدومي و يا اهلا بالضيوف.

.يا ريت تكوني واقعية في الحاجات اللي بتمنعي عنها طفلك و بتزعلي منه و بتعتبريه بيعاندك عشانها.

كتيب تنظيم المطبخ

Read More