مبادرة معاً لحياة أفضل..

كتبت : دعاء صفوت

السلام عليكم ورحمة الله وبركاته

70% من الرسائل اللي بتوصلني بتبدأ بعبارة شبه الآتي:

– انا تعبت و مش قادرة استحمل انا مضغوطة و مخنوقة اوي

– انا نفسي اتغير بس مش عارفة

– انا عصبية و مش عايزة اكون كدا بس مش عارفة اتغير

– ساعديني ارجوكي انا اؤذي اولادي بعصبيتي بس مش عارفة اتصرف

– انا مخنوقة و مش عارفة ابطل عياط

– انا بيبقى نفسي اعمل حاجات كتير و لكن مش قادرة او افقد الرغبة بسرعة

– الضغط بيحاصرني و بيدمر حياتي

– انا بقيت عصبية اوي و مش قادرة استحمل حاجة لا نفسي ولا الولاد

– تعبت و نفسي اخلص من الدنيا

أنا حاسة بيكي و مقدرة معاناتك.. بس انا مش معايا عصاية سحرية احول بيها حياتك الى نعيم،

الحل في ايدك انتي.. مش في ايد حد تاني

الموضوع عايز ارادة حقيقية.. و الا هاتقعي في دوامة الضغوط اللي حقيقي بتنتهي بأمراض جسدية و نفسية عجيبة

بس خليني في الاول كدا اوضح لك شوية حاجات عشان نبقى على نور

انا كمان بمر بنوبات ضغط نفسي زي اللي بتتكلمو عليها بالضبط، سواء بسبب التغيرات الهرمونية المرتبطة بالدورة الشهرية، أو بسبب نقص فيتامين دال، أو بسبب نقص هرمون الغدة الدرقية (و انا اكتشفت موضوع فيتامين دال و الغدة الدرقية دا بعد ما لقيت نفسي عصبية عصبية غير مبررة تماما.. و كأني شخصين شخص عاقل فاهم ان الامر ما يستحقش العصبية و العياط، و شخص تاني كأنه مش انا عصبي و متوتر و اكتئابي، و انا طبيعتي حقيقي مش كدا، فرحت لطبيبة و عملت لي شوية تحاليل طلع من ضمن نتائجها خلل في مستويات فيتامين دال و الغدة الدرقية)

انا كمان بمر ببعض الازمات الزوجية.. عادي باتخانق و اعيط و اتشحتف و اتشنهف.. دا أمر عادي هو الفكرة ازاي بنتعامل مع الامور، هل بنستمر في دوامة الغضب الزوجي و الملفات المفتوحة اللي بتدمر الدنيا ولا بعد كل خلاف بنطلع منه باستفادة

أنا كمان جوزي عصبي للغاية، و لما بيكون عصبي بيقول كلام جارح (و هو بيقرا البوستات دي و عارف )، و جوزي كان مقتنع ان الضرب وسيلة تربوية و ان القسوة على ابننا هاتطلعه راجل.. و بفضل الله بعد شغل و اجتهاد حوالي 8 سنين انفعاله على علي قل بنسبة 80%، و عصبيته بشكل عام قلت بنسبة 60%

أنا كمان مريم بنتي (خمس سنين) عنيدة لدرجة رائعة و لو نومها اتلخبط بتكون عصبية و صعبة اوي في التعامل و الارضاء، و اوقات كتير بجد باروح استخبى حتى ولو في الحمام بس عشان امنع نفسي اني اطلع غضبي عليها.. و باخد استراحة دقيقتين كدا و ارجع تاني اهدى

أنا كمان مش بالتزم بالرياضة بشكل كامل شوية اكمل و شوية ابطل.. مع اني عارفة انها هاتساعدني كتير في يومي..

طيب ايه الفايدة من اللي باقوله دا..

الفايدة هي التالي:

مافيش حياة سعيدة 100%

مافيش انسان كامل 100%

مافيش اطفال مثاليين 100%

مافيش ازواج على مزاجنا 100% و مش هايتغيروا ويكونوا على مزاجنا بين يوم وليلة.. و لنا اخطاؤنا ولهم اخطاؤهم ماحدش كامل بجد

الصورة الرومانسية للاسرة السعيدة اللي بتطلع في التلفزيون دي مش صح و ما تخليش حد يبرمجك انك ما ترضيش بحالك

احيانا كتيرة بنكون عارفين معلومات مهمة بس مش بنطبقها.. زي مثلا معلومة انك لازم تشربي لترين مية في اليوم عشان حياتك تتحسن بنسبة 60% و مع ذلك بننسى و بنفضل تعبانين

طيب عشان يكون المقال دا مختلف و نطلع منه بنتيجة حقيقية..خاصة إني حقيقي مش قادرة ارد على كل الرسايل و الاستشارات..

هانعمل حاجة شبه العلاج الجماعي.. حاجات هانلتزم بيها مع بعض، و مش هاقولكم مية حاجة مرة واحدة.. هانلتزم بحاجة او حاجتين.. و نطبقها اسبوع، وبعدين ننقل على اللي بعدها..

عشان كدا هانسمي السلسلة دي معاً لحياة أفضل..و السلسلة دي مخصصة ليكي انتي كأم. مش فقط كأم، بل كإنسانة.. عشان انتي تستحقي تتعلمي ازاي تتعاملي مع الضغوط اللي حواليكي وتعيشي حياة افضل..

هانعمل واجبين.. واحد على الجانب النفسي و الثاني على الجانب الصحي الجسدي..و نلتزم بيهم كويس أوي عشان ننقل على اللي بعده..

الأسبوع الأول:

الواجب على المستوى النفسي..

1- اكتبي لائحة بأسباب الضغوط عندك.. يعني ايه اللي بيخليكي تشعري بالتوتر و الضغط العصبي و قسميها قسمين..

القسم الاول: ضغوط خارج ارادتي: زي الزحمة في الشارع، حال التعليم في البلد، مديرك و نفسيته في الشغل، الضغوط اللي على مدير جوزك، حالة الطقس، التراب اللي في الجو، انقطاع الكهربا، انترنت بطيء، اسعار السلع.. كل الحاجات اللي ما تقدريش تعملي حاجة تجاهها.. ببساطة قولي لنفسك كدا مش بإيدي اعمل حاجة بالتالي مافيش فايدة تفضل دي مسببات ضغط عليا.. و قرري ان الحاجات دي مش هاتضغطك و لما تحصل.. فكري نفسك انها تضييع مشاعر و فقط.

القسم التاني: ضغوط اقدر اسيطر عليها، البيت مكركب، مهام كتيرة ووقت ضيق، و خلافه.. و ان شاء الله هاحاول انشر لك في الصفحة هنا مقالات هامة عن ترتيب البيت و تنظيم الوقت و تابعي معانا.

و حاولي في اللائحة التانية تحددي ايه الحلول اللي ممكن تعمليها للتقليل من الضغوط دي.. و هاتلاقي نفسك لما حددتي الحلول هاتبدأي تنفذيها او تعرفي ان مش في ايدك حاجة فتتقبلي الامر.

2- ابتسمي خمس دقايق متواصلة في اليوم.. اه اتدربي على الابتسام.. و شوفي نفسك في المراية.. يوميا.. لمدة اسبوع.. هاتحسي ان دا هبل .. بس صدقيني في الاول بس.. انا لما اكون متعصبة اوي.. اروح و ابتسم في المراية عشان ابعت لعقلي الباطن رسالة اني كويسة و حلوة.. و العقل الباطن صدقوني اهبل و بيصدق اللي بيشوفه و بيسمعه بس.. فبرمجوه على الابتسام

الواجب على المستوى الصحي و الجسدي:


الاسبوع دا اسبوع المشي.. و الكلام ليا قبل ما يكون ليكم.. نبدأ بخمستاشر دقيقة على الاقل.. خمستاشر دقيقة من وقتك ليكي، على جهاز مش في البيت او حوالين البيت او مش في المكان.. اي حاجة و في اي وقت.. هدفنا بنهاية الاسبوع اننا نمشي 40 دقيقة و انا مش محتاجة اقولكم نتايج المشي قد ايه رهيبة على المستوى النفسي و الجسدي والله.. الموضوع عايز التزام..

و مع المشي هانشرب لترين مية في اليوم على الاقل.. و انا بدأت فعليا انهاردة و شربت ازازتين 330 مل و ربنا ييسر باقي اليوم

ماحدش يقول مافيش وقت انا اكتر واحدة باقول مافيش وقت بس هالتزم، بتشجيعنا لبعض، في وقت و ربنا يبارك ان شاء الله

و ملحوظة بس صغننة: يا ريت اللي بتعاني من اعراض عصبية فجأة و دي مش طبيعتها.. تخطف رجلها لدكتورة شاطرة.. تتكلم معاها و تعمل تحاليل تطمن على الهرمونات و الانيميا وفيتامين دال.. عشان نزبط الناحية الصحية في نفس ذات الوقت..

على فكرة تاني.. الموضوع عايز إرادة.. وعزيمة.. و انتي قادرة .. و عندك رغبة حقيقية .. لاني انا و انتي مش عايزين نبقى فريسة للضغوط النفسية

و يمكن للأخوة الآباء يشتركوا معانا في الموضوع حقيقي هاينفعكم و يخفف من عصبيتكم بشكل رائع.. و هايكون وسيلة رائعة لتقديم الدعم لزوجاتكم..

الصورة المنشورة مع البوست دا هاتكون الصورة المشتركة لجميع منشورات مبادرة معاً لحياة أفضل..
معا لحياة أفضل

 مبادرة معاً لحياة أفضل.. قامت بها المستشارة الأسرية دعاء صفوت فى الوطن العربى من أجل صحة وسعادة كل الأمهات وتخفيف الضغط العصبى والنفسى عليهم. 

ونحن فى برنامج إدارة البيت سعداء بمشاركتنا معها فى هذه الحملة من أجل حياة اسرية أفضل لكل مديرات البيت بما أنه واحد من أهداف البرنامج المعلنة مسبقا. 

 رابط الحملة: حياتنا وولادنا مع المستشارة الاسرية دعاء صفوت

 
اخبر صديق



التعليقات

تعليق

تجهيز الوجبات الطبيخ

اشتركِ معنا وتابعي أحدث المقالات والعروض!

خطوات الانتقال من بيت إلى بيت
http://critic.net/