المراهقة – ملف كامل

* ما هي المراهقة
* أهم ميزات المرحلة على الجانب الجسدي
* بعض مميزات المرحلة على الجانب العاطفي
* النضج الجنسي
* كيف اهيء ابنتي للتعامل مع الدورة الشهرية
*كيف يهيء الأب ابنه للبلوغ وفترة المراهقة.
* تغذية المراهق


المراهقة

أغلب شكوى الأمهات بعد السنتين الأوليين من عمر الطفل و بعد مشاكل عناد الأطفال، هي عن فترة المراهقة، و انا مش عايزة اكتب كلام تقليدي عن المراهقة يتم التعامل معا هزي أي كلام صح بس ما بيجيش على هوانا، فنسمع ربعه و نرمي الباقي في الدرج، و بعدين نرجع نكمل وصلة الشكوى من اننا تعبانين اوي مع ولادنا اللي مطلعين عينينا و البنات البجحة اللي بقت ترد الكلمة بكلمتها.
بس خليني اتفق معاكم أولا ان مرحلة المراهقة ما هي إلا حصاد التربية في السنوات التي تسبقها، يعني إيه، احنا قولنا ان التربية هي عبارة عن زرع، حصد

اللي بنزرعه في مرحلة الطفولة المبكرة و المتوسطة بنحصده في مرحلة المراهقة، يعني إذا انا في مرحلة الطفولة احترمت رغبة الطفل في الاعتماد على النفس هايطلع مراهق بيتحمل المسؤولية، لو ربيت ابني على الحوار هايكون بيننا حوار و هو مراهق، لو ربيته على الاخترام هايحترمني
لو ربيته على الثقة هايثق فيها و يتكلم معايا

و بالمثل إذا انا ربيت على الضرب و الإهانة و الصراخ فإهلا و سهلا.. الطفل الصغير اصبح كبير يقدر يصرخ، ويعلي صوته زيه زيك، و يقدر يرزع الباب لو ما عجبوش كلامك و يقدر كمان يعلن تأففه منك و من زجرك الدائم له، و لما تكبري انتي و ابوه في السن شوية ، يقدر هو دلوقت يمد ايده ويضرب.. و حقيقي ربنا ما يكتبها على حد..
عشان كدا انا حقيقي باقول للامهات اللي لسة اطفالهم صغيرين ربوا صح من دلوقت..
و اما اللي عنده مراهقين و كان بيربي بأسلوب خطأ اعتقد ان الأوان نحاول نصلح الاخطاء اللي حصلت قبل كدا..و نتدارك ما يمكن تداركه..
بس بداية هابدأ بخصائص المراهقة و ميزاتها عشان نستعد لها او نفهمها لو احنا فيها، لأن الوقاية خير من العلاج، و بعدين هانتكلم في مشاكل المراهقة تباعا ان شاء الله.

في الماضي كانوا العلماء بيقولوا ان مرحلة المراهقة دي سيئة و مليئة بالمشكال و نوبات الغضب فقط، و كانوا بيفترضوا ان مهما كانت الظروف الاجتماعية فإن كل المراهقين متعبين بنفس القدر.
و لكن جت الدراسات الحدثية في القرن العشرين عشان تقول، لا يا جماعة صحيح ان التغيرات الجسدية و الهرمونية بتعمل في المراهق الأفاعيل، إلا ان التعامل مع المراهق بتفتح و بعيدا عن التشنجات، كلما قلت التقلبات المزاجية و نوبات الغضب الي بيم ربيها المراهق
اذا زي ما قولنا صحيح انها مرحلة مش سهلة، ولكن يمكن التعامل معاها و تقليل المشاحنات و الصراعات فيها، و أول حاجة تطمنا انها اسمها مرحلة، يعني فترة و هاتعدي، زي مرحلة التسنين، زي مرحلة تعلم المشي، مرحلة بتعدي وبتيجي مرحلة اخرى وراها مليئة بالحاجات الحلوة ان شاء الله.
و بعدين كلنا كنا مراهقين، و مرينا بكل الكلام اللي هانقراه في المقالات.. و يمكن في حاجات ما كناش فاهمينها، و لا اللي حوالينا كانوا فاهمينها ولو كنا فاهمين من زمان يمكن كان الحال اتغير.. و كانت اثار الكلمات اللي واجعانا دلوقت قل او اتغير.. او يمكن ما حصلش.
عشان كدا يلا بينا نفهم ايه اللي بيحصل في نمو المراهق :

أولا: النمو الجسدي:

من ناحية نمو الجسد فإن مرحلة المراهقة هي المرحلة التي نلاحظ فيها نمو سريع يشبه نمو الطفل في العامين الأوليين من عمر الطفل، ففي خلال سنوات معدودة نلاحظ تحول المراهق من طفل الى شاب و المراهقة من طفلة الى شابه،
تتميز المرحلة دي بعدم تناسق اجزاء الجسم مع بعض، و دا نتيجى لأن الجسم بينمو ابتداءا من الساقين و القدمين واليدين، و دول بينمو بسرعة وبعدين يجي نمو جذع الجسم.
عشان كدا بيكون شكل المراهق بالنسبة لنا غير متكافيئ، واعرفوا ان المراهق نفسه حاسس بعدم التناسق دا و قلقان انه ممكن ما يتغيرش شكله و يفضل على الحالة دي
و نتيجة النمو ايضا بيكون في شيء من عدم الاتزان في حركة المراهق، و خاصة الذكور، عشان كدا ممكن نلاقيه بيقع كتير او بيوقع الحاجات من ايديه، هو مش مستهتر، هو بجد بيشعر بعد الاتزان و محتاج يتعود على المقاسات الجديدة دي.

و من ناحية تانية بعض العلماء بيقولوا ان الفترة دي بيتسم فيها المراهقة والمراهقة بالميل الى الكسل و الخمول ، لعدة أسباب، احدها هو ان الجسم بيكون مركز في استغلال كل الطاقة للنمو، فبياخد كثير من طاقة الجسم لهذا الغرض، بالضبط زي الرضيع، اولا ايامه او اول اشهر بينام كتير لأن الجسم عايز يركز في النمو و اكتمال الاعضاء،

و بالضبط زي كدا لما بنتعب فالجسم بياخد الطاقة عشان يصلح الخلل اللي بيحصل و بنكون مهدودين و مافيناش حيل نعمل حاجة، ودا يقولنا ان المراهقين مش كسولين و خاملين.. و انا شخصياً أؤيد هذه النظرية بشدة.

ثانيا: النضج الجنسي:

في فترة المراهقة و كجزء من النمو بتنشط الغدد و بتشتغل على اعطاء كل من الذكر و الانثى الشكل الجسدي المميز له، وتبتدي تغيرات الصوت، و نمو الشعر .. ويليها بحبة صغيرة او كبيرة، اعلان الجسم عن اكتمال نمو اجهزته التناسلية، بالحيض لدى الفتيات او الدورة الشهرية، ودا بيكون في عمر من 11 إلى 14 سنة (قبل كدا بشوية او بعدها بشوية) و اذا تأخرت الدورة الشهرية عن 15 سنة يفضل اللجوء الى الطبيب.
اما الفتيان فبيكون اكتمال نضج اجهزتهم التناسلية بالاحتلام و دا بيحصل متأخر ما بين 13 إلى 16 سنة.
وحدث البلوغ هو من الاحداث الهامة الي لازم يتم تهيئة المراهقين ليها بالمعلومات الصحيحة، و ما تسبيهمش فرسية لخرافات الأصدقاء، وتهيئة يعني نمهد قبل ما يبلغو مش بعد، وطبعا احنا متفقين اننا وعينا تربويا عن حماية انفسهم من التحرشات الجنسية و علمناهم يحموا نفسهم ويحافظوا على خصوصية جسمهم اصلا. و ان لم يكن ارجو ان دا يتعمل في اقرب فرصة، و دا ابتداءا للاطفال من عمر سنتين
و يا ريت نسمع الفيديو :

طيب نمهد ازاي :

اولا البنوتات:

ابتداءا من سن خمس سنوات اصلا البنت بتبتدي تسأل هي ليه مش زي ماما وكبيرة، و احنا دورنا نفهمها هاتكبري و تبقي زي ماما و نجاوب على اسئلتها بوعي و شفافية
من سن 9 سنوات تقريبا و حسب النمو الجسدي للبنت، ابتدي اطمن البنت ان النمو الجسدي اللي بتمر بيه دا و التغيرات الشكلية اللي بتحصل لها ما هي الا كونها بتكبر و هاتبقى زي ماما ودايما احضنها و اتكلم معاها عشان هي عايزة تطمن،
وبعدين اختار وقت مناسب، انا فاضية فيه و مركزة مع بنتي و هي رايقة فيه، اقعد اكلمها بجدية و ود في نفس الوقت، اقول لها حبيبة قلب ماما كبرت وبقت شابة جميلة، بما اننا اصحاب انا عايزة افهمك اكثر عن نموك عشان في حبة تغيرات كدا هاتحصل الفترة الجاية وحلو اننا نكون عارفين المعلومات الصح
الفترة اللي انتي فيها دي جسمك بيطلع مواد كيميائية اسمها الهرمونات، دي المسؤولة ان صوتك يبقى شبه صوت الانسات الكبار مش زي صوت الاطفال، و ان جسمك يبقى شبه جسم الانسات الكبار، و الهرمونات دي اللي بتخليكي احيانا فرحانة اوي، او زعلانة اوي، بس اهم حاجة احنا نتعلم لما نكون زعلانين اوي نتكلم مع ماما او نرسم او نعبر عن اللي مزعلنا عشان نتعامل معاه
و من ناحية تانية فالأجهزة الداخلية في الجسم عندك بتنمو، ولما بيكتمل نموها بتيجي للبنات حاجة اسمها الحيض او الدورة الشهرية، هل انتي عارفة اي حاجة عنها؟…
المعلومات الصح بقى عن الحيض: هو عبارة عن بعض الدم بيخرج من المنطقة الخاصة او الحساسة عند البنوتة، دي حاجة طبيعية مش بتخوف عشان احنا جسمنا كل شهر بيتخلص من حبة الدم دول، الفترة دي بتستمر من 3 الى 7 ايام كل بنت غير التانية
و كمية الدم كمان بتختلف من كل بنت للتانية
واحنا في الفترة دي بنلبس حاجة اسمها الفوط الصحية، اللي طبعا هاريينا بيها اعلانات في التلفزيون، و انا بعد ما نخلص كلامنا هاعلمك بتتلبس ازاي و ازاي بنتخلص منها.
اللي بيحصل دا كله حاجة جميلة اوي و بتقول اننا بنكبر، ولكن للاسف في بنات بقى بتقعد تقول كلام مش حقيقي عنها فإنتي لو احتجتي اي معلومة عن الموضوع دا انا ماما صاحبتك و معاكي، و لو حتى انا مش عارفة الاجابة ممكن نسأل دكتورة على المعلومات الصحيحة
و على فكرة الفترة دي عادية انتي تقدري تتحركي و تخرجي وتلعبي رياضة و تاخدي دش عادي خالص مافيش اي حاجة، و الدكاترة كلهم قالو كداـ، مع ان تعرفي زمان كانو بيقولولنا ممنوع نلعب رياضة بس طلع الموضوع مش صح عشان كدا انا باقولك مش نسمع كل الكلام اللي بيقولوه احنا نسأل حد موثوق فيه
اه حاجة اخيرة يا حبيبة ماما، الحيض او الدورة الشهرية دي بيكون معاها شوية الم، لو شربنا حاجات دافية زي النعناع او القرفة بتروح و بنكون كويسين ان شاء الله، و طبعا بقى لازم نبعد عن الحاجات الباردة والبيبسي و الحركات دي عشان بتزود المغص حبة. و اصلا عشان صحتناوبعد الحيض انتي بقى بقيتي مكلفة رسمي بكل الحاجات اللي بتدربي عليها الفترة اللي فاتت من صلاة و صوم و كمان الحجاب..
و في فترة الحيض او الدورة نفسها احنا مش بنصلي و لا بنصوم دي رخصة من ربنا، بس لما بنخلص بنعوض الصيام انما الصلاة فلا خلاص مش بنعيدها
و بعد الحيض في حاجة اسمها غسل شرعي احنا هانتعلمه حبة حبة
و انا سعيدة جدا انك بنوتي الجميلة اللي كبرت.. و احضني بنتك اوي، و بصي في عينيها و قولي لها انتي اغلى صديقة عندي لانها محتاجة ثقة و محتاجة تشجيع و محتاجة حنان و اسأليها لو عندها اي سؤال..
و لأن تربية معظم الامهات اصلا كانت بتعتبر الكلام في الحاجات دي من التابوهات و مش بتعرف تتكلم فيها مع بناتها، يا ريت تتدربي على الكلام دا و تذاكريه كويس. عشان تقوليه للبنت بثقة و تديها شجاعة تتكلم معاكي، و ما تستسهليش و تقولي بنات اليومين دول عارفين اكتر من اي حد.. ماشي هم عارفين وممكن يكونوا خدو درس في العلوم عليه، عادي بس دورك تنبهي وتوعي.
اما بالنسبة للشباب بقى..فالقصة ايسر شوية، و يفضل طبعا ان الاب هو اللي يقوم بالجلسة دي.. على سن 12 الى 13 سنة تقريبا و يشرح فيها:

زي ما قولنا انت شاب ما شاء الله عليك، و هاتبتدي تكبر اهو عشان تبقى راجل زي بابا، في الفترة دي، هاتلاقي ايديك ورجليك بتطول، عادي عشان بقية جسمك ينمو معاهم و تبقى في بنية وجسم الرجال، و صوتك هايبقى خشن شوية وبعدين هايتزبط و يبقى شبه صوت بابا او عمو، هاتلاقي في زيادة في شعر الذراعين والقدمين و الابط و المنطقة الخاصة و دا كله عشان جسمنا بيفرز مواد كيميائية اسمها هرمونات هي اللي بتدينا الصفات اللي بتميزنا كرجال، و في الفترة دي العرق عندنا كرجال بيزيد عشان كدا لازم نحافظ على نظافتنا وناخد دش كل يوم عشان العرق لما بيتفاعل مع البكتيريا بيعمل ريحة مش لطيفة خالص و انت ابني النظيف دائما
اما عن العضو الذكري فهايبتدي يكبر، و دا عادي، وممكن في مرة من المرات و انت نايم تقوم تلاقي العضو افرز بعض السائل دا طبيعي و دليل انك خلاص بلغت. و الحاجة دي ربنا مديهالنا طبيعي عشان جسمنا يرتاح، ولما تقوم تلاقي كدا لازم نغتسل الغسل الشرعي اللي هاعلمهولك.
اللي بيحصل دا حاجة عادية اوي زي ما وانت صغير طلعلك سنان او اتعلمت المشي، احنا اصحاب لو عندك اي سؤال مهما كان غريب او فاكر اني مش هارد عليك انا هاجاوبك عشان ماحدش يقولك اي معلومة غلط لان الشباب بيحبو يقولو كلام كتير مش صحيح انا مصدرك و مرجعك العلمي لو احتجت اي حاجة
ونشرح للبنات والاولاد ان في المرحلة دي بيكون في شوية حبوب في الوش اسمها حب الشباب نقدر نعتني ببشرتنا باستخدام صابون طبي و نقلل من الحلويات و فترة و هايروح (لان المراهقين بجد بيهتمو بمظهرهم فوق تخيلكم )

وبكدا نكون شرحنا للولد وللبنت ايه اللي بيحصل لهم عشان يطمنو.. ويعرفوا ان دي مرحلة وطبيعية و هاتعدي وهايبقو كبار
وعشان يكون عندكم معلومات كافية لأي سؤال ارجو انكم تذاكروا الموضوع دا انا لقيته مفيد وواضح جدا، دا ليكم انتم يا اب و يا ام مش للابناء دلوقت خالص http://www.childclinic.net/pain/puberty.html

ثانيا: التغيرات الجسدية والعاطفية:

اغلب الدراسات بتقول ان في علاقة وثيقة بين الهرمونات الجنسية اللي بتكون نشطة في فترة المراهقة وبين التفاعل العاطفي عند المراهقين و مستويات الهرمونات المرتفعة خلال المرحلة دي بتسبب تقلبات مزاجية كبيرة على شكل غضب و اثارة وحدة عند الذكور و غضب و اكتئاب وحزن و نوبات بكاء غير مبررة عند البنات، و دا في الفترة من تسع الى14 سنة.

و دائما باقول لأم المراهق او المراهقة لما تشتكي من تقلباته المزاجية ان احنا الاناث نعاني من التقلبات المزاجية في فترة ما قبل الدورة الشهرية و بنعيط و بنعصب و حالتنا حالة، و بنشتكي في الاخر ان ماحدش مقدر الضغط اللي علينا، المراهق و المراهقة بيمروا بهذه الضغوط الهرمونية العصبية و لفترة اطول فالأولى اننا نتفهم الي بيحصل لهم و نقدر شعورهم.
ولكن للاسف أغلب الأهل لا يتفهم هذه التغيرات ولا يستجيب لها بالشكل المطلوب، عشان كدا بنجد ان المراهق بيحب يدور على خد يفهمه و بالتالي بيحب يروح لاصحابه كتير ويتكلم معاهم من باب كلنا في الهوا سوا.
و يفضل المراهقين بقى يشتكو نفس الشكوى و في كثير منهم يتمنى الاستقلال عن منزل اهله لكن اللي ماسكه او مانعه هو الحاجة المادية والاقتصادية. عشان كدا يا ريت نراجع انفسنا كويس.

تغذية المراهق:

نتيجة التسارع الكبير في نمو المراهق فإن الجسم بيحتاج الى 2700 سعر حراري
و المراهقة الى 2200 سعر حراري، ولكن للاسف في هذه السن العادات الغذائية السيئة بتكون احد مفضلات ابنك او بنتك فالبيبسي و البطاطس و السيبش بيكون صديقهم الصدوق.. و هنا بنقول ما تعمليش صدام، حاولي توصلي لتوافق معاه ان يا حبيبي انت مسموحلك بالاكلات السريعة مرتين في الشهر مثلا عشان صحتك، و
هنا انصح ان يتم مشاركة الاسرة في مشاهدة حلقات خواطر 10 حلقة الاكل السريع و اخطاره على القلب، و دا بشكل غير مباشر و بلاش نقعد على قلب الولد نقول مممم شفت اهو اللي باقوله صح
المراهق لا يحب التأنيب ولا المحاضرات، و الجملة دي هاتسمعوها مني مرارا و تكرارا، المراهق لا يحب التأنيب ولا المحاضرات.
سيبيه و هو هايدورها في دماغه … و بالحوار البناء نوصل للي احنا عايزينه.

مع خالص محبتي..

دعاء صفوت


المراجع:

– مشكلات الطفولة و المراهقة،أسسها الفسيولوجية و النفسية د.عبدالرحمن العيسوي
– الطفولة و المراهقة د. سعد جلال
– دكتور سبوك يتحدث إلى الأمهات
– دراسات في الطفولة و المراهقة : د. أحمد محمد عبد الخالق & د. مايسة أحمد
– المراهقون المزعجون د. مصطفى أبو السعد
– هكذا نربي د. مصطفى أبو السعد
– سيكولوجية المراهقة مجموعة مرلفين
– فن التعامل مع المراهقين د. ياسر نصر
– محاضرات و استشارات مسموعة للدكتور طارق الحبيب
– اولادنا من الطفولة حتى المراهقة ريتا مهرج
– كيف افهم المراهق د. عبدالرحمن بكار

 
اخبر صديق



التعليقات

تعليق

تجهيز الوجبات الطبيخ

اشتركِ معنا وتابعي أحدث المقالات والعروض!

خطوات الانتقال من بيت إلى بيت
http://critic.net/